Pas Pakos së Madhe, tjetër bonus në ndihmë të pensionistëve

Kryeministri Edi Rama bëri të ditur se përveç bonusit së Pakos së Madhe që ka nisur të shpërndahet, pensionistët do të marrin një tjetër bonus të programuar nga taksa e jashtëzakonshme mbi eksportuesit e energjisë.

“Të gjithë pensionistët po marrin këto ditë sipas premtimit bonusin e Pakos së Madhe dhe urojmë ta kenë sa më të mbarë e me shëndet të plotë, vitin që sapo ka nisur. Me marrjen e këstit të parë të taksës së jashtëzakonshme mbi eksportuesit e energjisë në muajin prill, do të programojmë një tjetër bonus për pensionistët, që barra e inflacioni i luftës për ta të vazhdojë të jetë sa më pak e ndjeshme”, informoi Rama.

Kryeministri ndau në rrjetet sociale videon e dëshmisë së një pensionisti, i cili veç indeksimit të pensionit dhe bonusit të fundvitit, ka tërhequr tashmë edhe bonusin e Pakos së Madhe.

65-vjeçari me profesion ushtarak tha se, ka dalë në pension 2 muaj më parë, ndërsa për shumë vite ka shërbyer si pilot në Forcat Ajrore.

“Si ushtarak e kam ndjekur me vëmendje situatën ndërkombëtare, veçanërisht luftën në Ukrainë. Kjo luftë ka sjellë dëme pothuajse në gjithë botën, kështu edhe te ne. Çdo qeveri merr masat e saj. Edhe qeveria jonë mori masa për të ndihmuar shtresat në nevojë dhe në përgjithësi të gjithë popullsinë”, tha ai.

“Unë isha me fat sepse arrita edhe indeksimin e pensioneve, dhe bonusin e Vitit të Ri dhe në muajin janar tërhoqa në postë vlerën e Pakos së Madhe bashkë me pensionin mujor. Këto ishin një nga masat më domethënëse të qeverisë për të zbutur sadopak efektin e krizës financiare që ka përfshirë gjithë botën”, tha ai.///