SARANDANEWS.AL

Lajme nga Saranda News Albania. Saranda Radio transmetim live nga Saranda dhe Ksamil. Lajmi fundit ne Saranda News.Al, Foto dhe Video Livestream

Viti 2022: rritje e turistëve në Shqipëri, por sfidat mbeten me cilësinë

Viti që po mbyllet shënoi për Shqipërinë prurjen më të lartë të turistëve të huaj duke kapërcyer edhe periudhën e para fillimit të pandemisë së koronavirusit.

Gjirokastra, një qytet që mbrohet nga UNESCO, ishte një nga destinacionet kryesore të turizmit kulturor me një rritje të ndjeshme të turistëve.

Qyteti po përgatitet për festat e fundvitit dhe në pazarin historik 30-vjeçar atmosfera ka nisur të ndihet. Prania e njerëve është e vogël për shkak se zonat janë prekur ndjeshëm nga emigracioni dhe në dimër numri i turistëve vendas, por sidomos të huaj, është ende i ulët.

Sipas të dhënave të bashkisë qyteti ka përjetuar këtë vit prurjen më të lartë turistike duke kalur shifrat e vitit 2019 që vlerësohej viti më i mirë turistik për Shqipërinë para pandemisë së koronavirusit.

Drejtori i turizmit në Bashkinë e Gjirokastrës Blerim Kore thotë se viti 2022 po mbyllet me një vizitueshmëri shumë më e lartë se vitet e shkuara.

“Janë rreth 200 mijë turistë vendas dhe të huaj prej fillimit të këtij viti të ciëlt kanë vizitur vlerat e trashëgimisë kulturore, arkitekturore dhe zonat përreth Gjirokastrës. Është një vizitueshmëri shumë herë më e lartë krahasuar me vitet paraardhës.”

Edhe në nivel kombëtar Shqipëria përjetoi këtë vit rritjen më të madhe të turistëve gjatë gjithë viteve të fundit. Sipas të dhënave të Institutit të Statistikave rreth 6,8 milionë shtetas të huaj hynë në Shqipëri për periudhën janar -tetor kryesisht për qëllime turistike nga rreth 5,2 milionë që kishin hyrë një vit më parë.

Organizata Botërore e turizmit e renditi Shqipërinë në destinacionin e dytë në botë, dhe të parin në Europë për sa i përket rritjes së numrit të turistëve krahasur me periudhën e para pandemisë që përkon me vitin 2019.

Sipas Barometrit të Turizmit Botëror publikuar nga kjo organizatë, nga janari në shtator të vitit 2022, në Shqipëri kishin mbërritur 18% turistë më shumë se viti 2019.

Shtimi i turistëve e ka vënë sektorin turistik në sfida të mëdha me shërbimet thotë Kristina Fidhi që drejton platformën e sipërmarrjeve turistike “Visit Gjirokastra”

“Kemi probleme serioze të lidhura me shërbimet dhe sidomos me kapacitetet. Kjo me kapacitete akomoduese apo në restorante por edhe me shërbime ndaj turistëve që dalin përtej qytetit. Një sfidë e madhe që ka pasur biznesi këtë vit që i ka shtuar disi edhe cilësinë ka qenë sfida e mungesës së stafit. Nëse nuk dalim nga ky ngërç do vijojmë të kemi probleme. Fakti që kishim më shumë vizitorë nuk na bën më të mirë cilësisht.”

Zonja Fidhi thotë më tej se ka ndryshime të rëndësishme si në tregjet turistike dhe në destinacionet e turistëve.

“Kemi ndryshime të tregjeve, ndryshime të interesit të klientëve, ndryshime të destinacionit, vendeve për t`u vizituar. Kemi tani vizitorë që janë të prirur më shumë tek gjërat për t`u bërë se sa gjërat për t`u parë. Sigurisht nuk neglizhohen sitet e rëndësishme kulturore që janë për t`u vizituar, por kemi një tendencë ndaj natyrës, aventurës, drejt fshattit , drejt e ksperiencave.

Zonja Fidhi thotë më tej se rruga e re Kardhiq – Delvinë ndikoi këtë vit në lidhjen më të mirë të dy destinacioneve, atij bregdetar dhe atij natyror në rajonin e Gjirokastrës.

“Rruga Kardhiq Delvinë ka lidhur në njëfarë mënyrë dy destinacione që janë dy botë paralele të ndryshme dhe janë një potencial shumë i madh i rajonit. Në 40 minuta t’i lidhë një destinacion tërësisht autentik malor me histori e trashëgimi kulturore me një rajon detar që ka një potencial tërësisht të ndryshëm”.

Periudha e pas pandemisë ka nxitur interesin për forma të reja të turizmit në Qarkun e Gjirokastrës dhe më gjerë, thotë Vasil Garo, një sipërmarrës i një agjensie turistike.

“Ai që po merr trend dhe një zhvillim tani është agroturizmi. Klientët kanë dëshirë dhe preferojnë të shpenzojnë kohën në bujtina, në vende të vogla, në fshatra të vegjël ku ata mund të bëjnë eksperienca lokale dhe pjesën e turizmit familjar”.

Zoti Garo flet edhe për sfidat e këtij sektori këtë vit.

“Mungesa e kapaciteteve të burimeve njerëzore është një nga sfidat më të mëdha si dhe trajnimi i stafeve të kualifikuara për shërbimet në këtë sektor”.

Operatorët turistikë vlerësojnë se pritshmëria e të ardhurave nga turizmi, megjithëse prurjet e turistëve si vendas dhe të huaj ranë për shkak të rritjes së kostove për sipërmarrjet dhe uljes së shpenzimeve nga vetë pushuesit.//VOA///

error:
%d bloggers like this: