SARANDANEWS.AL

Lajme nga Saranda News Albania. Saranda Radio transmetim live nga Saranda dhe Ksamil. Lajmi fundit ne Saranda News.Al, Foto dhe Video Livestream

Zbatimi i hartës së re gjyqësore përmbyllet në korrik

Ministri i Drejtësisë, Ulsi Manja renditi sot miratimin e hartës së re gjyqësore, shtyrjen e mandatit të funksionimit të organeve të Vetingut, rritjen e numrit të kandidatëve për magjistratë, lehtësimin e stokut të dosjeve në Gjykatën e Lartë dhe lehtësimin e ngarkesës së gjykatave sa u takon shqyrtimit të dosjeve si 5 arritjet e Reformës në Drejtësi për vitin 2022. Në konferencën për shtyp, së bashku me ministrin e Brendshëm Bledi Çuçi, për analizën e punës, Manja po ashtu u ndal dhe në objektivat për këtë vit, ku veçoi si më parësorin zbatimin e hartës gjyqësore.

“Zbatimi i hartës gjyqësore, riorganizimi i gjykatës së shkallës së parë, gjykatës së Apelit të Juridiksionit të Përgjithshëm, lehtësimi i ngarkesës së gjykatave sa i takon shqyrtimit të dosjeve të pronave, si dhe hapja e zyrave të ndihmës juridike falas në ambientet e gjykatave që do të mbyllen janë objektivat themelorë“, tha ai.

Sipas tij, harta e re gjyqësore do të zbatohet në bashkëpunim të ngushtë me Këshillin e Lartë Gjyqësor.

“Zbatimi i hartës së re gjyqësore do të nisë më 1 shkurt me riorganizimin e gjykatave të Apelit, duke vijuar më pas me ato të shkallës së parë, për t’u përmbyllur në korrik të 2023-shit me riorganizimin e gjykatave administrative të shkallës së parë“, u shpreh ministri.

Manja deklaroi se arritjet që Shqipëria ka bërë në fushën e drejtësisë, rendit dhe sigurisë publike janë vlerësuar edhe nga BE.

“Drejtësia, rendi dhe siguria publike janë dy kolonat e rëndësishme për shtetin e së drejtës. Nuk u zgjodh rastësisht Tirana për organizimin e ministerialit të Ballkanit Perëndimor me Bashkimin Europian të ministrave të Drejtësisë dhe atyre të Brendshëm. Presidenca çeke e BE-së zgjodhi Tiranën për shkak të arritjeve që Shqipëria ka në fushën e drejtësisë, rendit dhe sigurisë publike”, u shpreh Manja.///

error:
%d bloggers like this: