Gjirokastër, po transportonte 11 emigrantë, arrestohet 35-vjeçari

Drejtoria Vendore e Policisë Gjirokastër ka kryer operacione të njëpasnjëshme kundër veprimtarisë kriminale të dhënies ndihmë shtetasve të huaj, kundrejt fitimeve, për kalim të paligjshëm të kufirit.

Së fundmi është finalizuar operacioni policor i koduar “Road Guard 65”. Në kuadër të këtij operacioni u arrestua  një 35-vjeçar dhe u procedua penalisht një 32-vjeçare (bashkëjetues), pasi u kapën në flagrancë teksa transportonin 11 emigrantë nga vendet e treta, kundrejt shumës 500 euro/person,

Gjithashtu u sekuestruan 5500 euro të përfituara nga kjo veprimtari kriminale, automjeti me të cilin transportoheshin emigrantët dhe 3 celularë.

Specialistët e Seksionit për Hetimin e Trafiqeve të Paligjshme, në bashkëpunim me ata të Seksionit Operacional të DVP Gjirokastër dhe Forcën e Posaçme Shqiponja, në vijim të operacioneve të njëpasnjëshme për goditjen e veprimtarisë kriminale të transportimit të shtetasve të huaj, për kalim të paligjshëm të kufirit, mbështetur dhe nga inteligjenca policore, kanë finalizuar operacionin policor të koduar “Road Guard 65”, si rezultat i të cilit u arrestua në flagrancë shtetasi J. L., 35 vjeç, banues në Tiranë, si dhe u referuan materialet në Prokurori ku nisi procedimi në gjendje të lirë për shtetasen B. S., 32 vjeçe, banuese në Tiranë (bashkëjetues). Në aksin nacional “Gjirokastër-Tepelenë”, në vendin e quajtur “Serat në Mashkullorë”, këta shtetas u kapën në flagrancë teksa transportonin në drejtim të Shkodrës, me një automjet tip furgon që drejtohej nga 35-vjeçari, 11 emigrantë nga vendet e treta, kundrejt shumës 500 euro/person.

Në cilësinë e provës materiale u sekuestruan 5500 euro të dyshuara të përfituara nga kjo veprimtari kriminale, automjeti me të cilin transportoheshin emigrantët dhe 3 celularë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.///