“Plazhi i Lirë”, sekuestrohen 37 çadra dhe 68 shezlongë

37 çadra dhe 68 shezlongë janë sekuestruar nga Policia e Vlorës sot në kuadër të operacionit “Plazh I Lirë”.

Përmes një njoftimi për mediat, Policia e Vlorës ka bërë me dije se vijon operacioni “Plazh i Lirë”. Në kuadër të këtij operacioni, që ka nisur nga Dhërmiu, duke vijuar në drjetim të jugut janë konstatuar 3 raste të pushtimit të hapësirave publike për t’i shfrytëzuar me qëllim fitimin. Gjatë operacionit u sekuestruan 37 çadra dhe 68 shezlongë.

“Në vijim të veprimeve procedurale për këto raste, specialistët për Hetimin e Krimeve të Komisariatit të Policisë Himarë referuan materialet në Prokurori ku nisi procedimi në gjendje të lirë për shtetasit: R. I., banues në Tiranë, pasi kishte vendosur pa autorizimin përkatës, 15 çadra dhe 30 shezlongë; L. C., banuese ne Tirane, pasi kishte vendosur pa autorizimin përkatës, 12 çadra dhe 24 shezlongë; E. A., banues në Tiranë, pasi kishte vendosur pa autorizimin përkatës, 10 çadra dhe 14 shezlongë”, njofton Policia e Vlorës.

“Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme, për veprat penale “Pushtimi i tokës”, “Mospagimi i taksave dhe i tatimeve” dhe “Ushtrimi i aktivitetit tregtar i paregjistruar”.  Operacioni “Plazh i lirë” vijon.”, mbyll njoftimin Policia e Vlorës.///