Zjarri në Finiq, Vengu: Ndërhyrje të gjata dhe eficiente nga ajri, gjendje vigjilence gjatë natës

Ministri i Mbrojtjes, Pirro Vengu në një dalje publike mbrëmjen e sotme sqaroi për opinionin situatën e zjarreve në Delvinë dhe Finiq, ndërsa flakët sipas raportimeve gjatë pasdites kanë kaluar parkun arkeologjik të Finiqit ndërsa më herët rrezikuan të ndihmuara nga era, edhe banesa në 2 fshatra.

Së bashku me zyrtarë lokalë, Vengu informoi përpjekjet e forcave të emergjencave civile, ushtrisë dhe trupave lokale për të vendosur në kontroll flakët.

Ai theksoi se që prej mesditës ka pasur një situatë problematike në rrafshin e kodrave që ndan dy bashkitë, por bashkërendimi i forcave të shumta bëri të mundur shuarjen e një pjese të madhe të vatrave.

“Jemi përqendruar me 8 mjete zjarrfikëse, 40 trupa zjarrfikëse nga 2 bashkitë si dhe 65 forca të armatosura. Kemi pasur ndërhyrje të gjata dhe eficiente nga forca ajrore që ka bërë të mundur frenimin e të gjitha vatrave në drejtim të zonave të banuara. Pas tyre, rëndësi kanë marrë zonat ekonomike dhe parku me vlerë kulturore e arkeologjike i Finiqit”, tha ai.

Sipas ministrit, infrastruktura e aksesit në park është shpëtuar falë ndërhyrjes së gjithë trupave zjarrfikëse të Finiqit që kanë bërë punë të shkëlqyer.

“U bë e mundur ruajtja dhe mbrojtja e gjithë pasurisë kulturore në park, pjesa e bazilikës, thesarit të vjetër sikundër edhe amfiteatrit”, tha ministri Vengu.

Ai shtoi se ka pasur koordinim të mirë dhe do të jetë një natë vigjilence.

Prefekti i qarkut Vlorë, Kristo Kiço u shpreh gjatë komunikimit se ka pasur ndërhyrje dhe ndihmë të shpejtë nga Ministria e Mbrojtjes.

Sipas tij, bashkia e Finiqit reagoi po ashtu shpejt, ndërsa zjarri i mesditvs së sotme nga dinamika mund të cilësohet si një nga zjarret më të fuqishëm që ka ndodhur ndonjëherë.

“Zjarri u përhap në mënyrë të rrufeshme edhe për shkak të erës që e favorizoi. Rëndësi ka që nuk kemi dëme në njerëz dhe banesa dhe këtë udhëzim e dhamë që në fillim”, tha ai duke falënderuar për dërgimin e menjëhershëm të helikopterit të Ministrisë së Mbrojtjes, që sipas tij, fha një ndihmë të madhe.

Një vatër e madhe zjarri është aktivizuar rreth mesditës së sotme në bashkinë e Finiqit, që ndodhet 20 kilometra nga Saranda.

Në operacionin për fikjen e zjarrit u përfshirë forca të shumta nga strukturat e pushtetit vendor të bashkive Sarandë, Himarë, Gjirokastër, Dropull dhe Konispol, të mbështetura nga efektivët e Forcave të Armatosura dhe helikopteri Cougar.(Juliana Prifti).///