Basha në Gjirokastër: Më 25 prill do ta çlirojmë Shqipërinë nga papunësia

Kryetari i Partisë Demokratike, Lulzim Basha, vizitoi sot qytetin e Gjirokastrës, ku tha se “më 25 prill do ta çlirojmë Gjirokastrën dhe Shqipërinë, nga mjerimi e nga papunësia”

Në fjalën e tij gjatë takimit me qytetarët duke i falënderuar për pritjen Basha theksoi se “ndryshimi shihet në sytë e nënave nga Gjirokastra deri në Shkodër”.

“Më 25 prill çdo shqiptar e çdo shqiptare do të votojë për ndryshimin, do të votojë për fëmijët e tij dhe të saj, do të votojë për ekonominë, për punësimin, për Europën dhe për Shqipërinë si gjithë Europa”, – tha Basha.

Kreu i PD-së u shpreh se “ju bëj thirrje e para të merrni masa me maska dhe me distancë, kujdesuni për shëndetin tuaj. Dhe e dyta, mos harroni kjo është një betejë për fëmijët tuaj, për familjet tuaja. Është një betejë fitorja e të cilës do të thotë fitore e Gjirokastrës, fitore e Shqipërisë dhe e shqiptarëve pa dallim”.

Kryetari Basha vizitoi edhe shtëpinë muze të Musine Kokalari ku zhvilloi një bisedë me mbesën e Musine Kokalarit, Arjeta Kokalari.

I gjithë restaurimi i shtëpisë është bërë me kontributin e saj dhe të bashkëshortit të saj, pasi për shumë vite shtëpia ka qenë e panjohur për vizitorët. Sipas saj, edhe pse kryeministri vjen shpesh në Gjirokastër, ai nuk e ka vizuar asnjëherë këtë shtëpi.

Basha tha se “shqiptarët e dinë se kush është Musine Kokalari dhe sakrificën e saj”.

Sipas tij, kjo është edhe arsyeja se pse kjo shtëpi është lënë në harresë nga qeveria dhe nuk vizitohet nga kryeministri.

Ai u zotua se me ardhjen në pushtet të Partisë Demokratike, shtëpia do të restaurohet dhe do t’i kthehet në një vlerë qytetit të Gjirokastrës.///