Berisha: Forma e hyrjes në zgjedhje do vendoset nga Këshilli Kombëtar

Kryetari i grupit të Rithemelimit Sali Berisha foli sot në lidhje me vendimin e Gjykatës së Apelit e cila e riktheu për rigjykim legjitimitetin e vulës dhe logos së PD-së.

Në një prononcim për mediet, Berisha tha se ka një elektrizim në radhët e demokratëve të cilët kanë marrë një solidarizim të madh nga qytetarët dhe mbështetje për aktin absurd, të cilin nuk ka njeri të ndershëm në këtë vend që nuk e dënon.

“Ndërkohë ne kemi besim tek Gjykata Europiane, kemi besim se janë shkelur të gjitha parimet e një drejtësie të një vendi anëtar të Këshillit të Europës dhe çështjen do ta dërgojmë sa më shpejtë që mund të pranohet prej tyre në atë gjykatë”, tha Berisha .

I pyetur nga mediat se, cilat janë format përmes të cilave do dërgohen në zgjedhje kandidatët, Berisha tha se “propozime janë-koalicioni; propozim është-të pavarurit, por kjo nuk shkon shumë, ka pak mbështetës. Megjithatë do të merret vendim nga Këshilli Kombëtar i PD”.

“Besoj se çdo anëtar i PD-së, çdo zyrtar, çdo deputet i saj, çdo mbështes i saj, e ka të qartë aktin armiqësor dhe atë, askush të mos mendojë se ne do të mposhtemi nga armët e Edi Ramës! Ne jemi në këmbë sot më të fuqishëm se kurrë”,- tha ai///