Arkitekti i projektit fitues për Parkun Kombëtar të Butrintit, vizitoi qytetin antik

 Ministrja e Kulturës, Elva Margariti shoqëroi dje në Parkun Kombëtar të Butrintit një vizitor të veçantë, arkitektin me famë botërore Kengo Kuma i studios Kengo Kuma and Associates.

“Ndihemi të nderuar që jo vetëm projekti arkitekturor i qendrës së re të vizitorëve të këtij parku nën mbrojtjen e UNESCO-s mban firmën e tij, por edhe për promovimin e shkëlqyer që figura të tilla i bëjnë trashëgimisë sonë kulturore”, është shprehur ministrja e Kulturës.

Ministrja Margariti, arkitekti Kengo Kuma dhe grupi që i shoqëronin kanë ndjekur itinerarin turistik në Butrint shoqëruar nga ciceroni i cili ka njohur të pranishmit me detaje të qytetit antik.

Me herët Ministrja e Kulturës, Elva Margariti e ka vlerësuar shpalljen fituese të studios japoneze KENGO KUMA, për projektin e Qendrës së Vizitorëve në Parkun Kombëtar të Butrintit, si një hap të rëndësishëm drejt rijetëzimit dhe modernizimit të Parkut Kombëtar të Butrintit.

Titulli i projektit fitues nga Kengo Kuma Associates është “Urat-Between Heritage and Nature”.

Projekti japonez u vlerësua jo vetëm zgjidhjet arkitekturore, apo elemente të veçantë të estetikës, por edhe qasjen konkrete ndaj pasurisë natyrore dhe kulturore të Parkut Kombëtar të Butrintit

Qendra e re do të jetë 1000 metra katrore, e konceptuar realisht e fizikisht si një portë hyrëse e Parkut Kombëtar të Butrintit.

Ajo do të jetë në një pozicion prej 1,5 kilometrash nga hyrja aktuale e parkut, pikërisht për t’i dhënë akoma më tepër frymëmarrje hyrjes në Butrint dhe për të krijuar realisht një portë mikpritese, ku vizitorët do të gjejnë më shumë shërbime, informacion etj.///