Berisha: Betejë pa kthim për shpëtimin e Demokracisë

Kreu i Rithemelimit Sali Berisha u shpreh sot se Kuvendi Kombëtar i thirrur prej tij konfirmoi qëndrimin për mosbindje civile. Sipas Berishës, kjo është e vetmja rrugë që çon në fitore opozitën dhe se kjo është një betejë pa kthim për shpëtimin e Demokracisë. Kuvendi ishte një votëbesim për linjën politike të PD-së në këtë moment historik. Ajo votë ishte votë për angazhimin e PD-së në një betejë pa kthim”, tha Berisha.

“Në një betejë pa kthim për shpëtimin e shoqërisë shqiptare, shpëtimin e demokracisë, në një betejë pa kthim në të cilën ne, të flasim haptas, u themi të vërtetën në sy shqiptarëve se me Edi Ramën, zgjedhje nuk ka dhe se ne kemi misionin sublim, rikthimin e votës së lirë të shqiptarëve”, vijoi Berisha.

“Unë mirëkuptoj secilin prej jush, që me shumë të drejtë, keni vërejtje serioze për funksionimin e PD-së, për organizimin e PD-së, për mobilizimin e PD-së dhe ne nuk duhet të heqim dorë kurrë nga dhënia e përgjigjes më të mirë të këtyre problemeve.
Por, duhet të jemi të vërtetë me qytetarët. Me Edi Ramën, çfarë do që të bëjmë ne, zgjedhje nuk ka”, u shpreh Berisha.

“Nuk ka betejë më të shenjtë për një forcë politike dhe për një shoqëri se beteja për votën e lirë. Pse e votoi Kuvendi, Sali Berishën? E votoi pikërisht për linjën e mosbindjes civile. E votoi pikërisht për betejën pa kthim. E votoi pikërisht me bindjen më të madhe se me këtë rrugë, PD do ecë drejt fitores. Do fitojë!”, u shpreh Berisha.///