Berisha-drejtuesve politikë: Beteja jonë mbrojtja e votës, të faktojmë krimin elektoral në qarqe

 Kryetari i Partisë Demokratike Sali Berisha zhvilloi sot një mbledhje me drejtuesit politikë, pas rezultatit në zgjedhjet parlamentare të 11 majit.

Berisha se në këtë fazë “detyra numër një është mbrojtja e votës duke paraqitur dhe faktuar të gjithë universin kriminal të qarqeve tuaja”.

“Të gjithë ndërhyrjet kriminale në qarqet tuaja, çdo evidentim pasi beteja jonë për mbrojtjen e votës së shqiptarëve është betejë për fatin vendimtar të Shqipërisë dhe demokracisë shqiptare”, u shpreh Berisha.

Sipas Berishës kjo është betejë “të cilën ne do ta fitojmë sepse sot nuk ka shqiptar që e njeh veten të tillë dhe nuk pa me sytë e tij se si me vendime qeverie u grabitën zgjedhjet.

“Nuk ka shqiptar që mund të pranojë për standard shpërndarjen e 100 eurove për person për të blerë votën”, tha Berisha.

Sipas Berishës detyra e drejtuesve të qarqeve “është dokumentimi me vërtetësi dhe dokumenta të plota”.

“Ne do ta fitojmë sepse së pari këto krime madhore elektorale janë krime të paralajmëruara dhe të denoncuara në rezolutat e fuqishme ndërkombëtare, si asnjëherë më parë”, tha Berisha.

Së dyti nënvizoi Berisha “dua të përshëndes vëzhguesit, të OSBE/ODIHR, Parlamentit Europian dhe të Këshillit të Europës, për konstatimet e tyre madhore, me të cilat këto zgjedhje de facto rrëzohen”.

Sipas Berishës “është radha jonë të dorëzojmë të faktuar të gjithë batërdinë elektorale të narkoregjimit në zgjedhjet e 11 Majit”.

“Kjo është një kauzë e drejtë, e dobishme, e vlefshme për çdo sakrificë. Ndaj dhe ne duhet t’u dalim zot me vendosmëri të madh aspiratave të votës së lirë të gjysmë milioni shqiptarë”, tha Berisha.(M.QEFALIA)///