Berisha: Nga 22 dhjetori, protesta deri në krijimin e qeverisë teknike

Kryetari i Partisë Demokratike, Sali Berisha njoftoi sot nisjen e protestave qytetare në datën 22 dhjetor, që sipas tij, do të ndërpritet vetëm me rrëzimin e këtij pushteti, krijimin e qeverisë teknike dhe votimin e lirë të shqiptarëve.

Duke informuar mbi vendimin e djeshëm të Kryesisë së PD-së, Berisha tha se në këto protesta do të bashkohen shqiptarë të të gjitha bindjeve, por që guxojnë të shprehin zërin e tyre kundër vjedhjes së parave dhe pasurive të taksapaguesve shqiptarë.

Berisha theksoi se u faktua me dokumente të pakundërshtueshme, por dhe me raporte ndërkombëtare nga më seriozet, se në Shqipëri u zhvillua një farsë elektorale.

“Edi Rama përdori të gjitha bandat të cilat futën në parlament, një për një 28 deputetë.
Manipuloi në mënyrë monstruoze votën e diasporës”, theksoi ai.

Berisha tha se do të përdoren të gjitha format e protestave. “Kurrë ndonjëherë më shumë, vendi nuk ka pasur nevojë për kreativitetin, për guximin dhe vendosmërinë e idealistëve shqiptarë”, shtoi ai.

Duke folur për zgjedhjen e Avokatit të Popullit, Berisha tha se ai u zgjodh pa firmat e opozitës, duke marrë edhe atë grimcë pushtet që kishte mbetur i ndarë.

“Firmosja e kandidaturës së Endrit Shabanit ishte një gabim, akt i nxituar, i cili ndodhi në një periudhë kur u krijua një lloj koalicioni për kandidaturën e Bashkisë së Tiranës. Megjithatë, nuk është ajo firmë që bëri të mundur zgjedhjen e Endrit Shabanit, se ajo firmë u tërhoq po me firmë nga të gjithë ata që i kishin vendosur firmat. Pra, njëra anë është një nxitim dhe gabim për të cilin unë kam kërkuar dhe kërkoj prapë ndjesë, por ana tjetër është zgjedhja, nuk u bë nga firmat se firmat u tërhoqën”, shtoi ai.

Ndërsa lidhur me vendimin e Gjykatës Kushtetuese që hoqi pezullimin nga detyra të zv/kryeministres Belinda Balluku, njëherësh ministre e Infrastrukturës dhe Energjisë, Berisha tha se ai vendim u shkrua në zyrën e Edi Ramës, pas presioneve të jashtëzakonshme.

“Ky vendim tejkalon të gjithë sistemin gjyqësor shqiptar, i cili ka tagrin në përputhje me Kushtetutën të shqyrtojë masat e sigurisë, Gjykatës së Apelit dhe asaj të Lartë. Duke anuluar pezullimin e Lubi Ballukut, duke i dhënë dhe 1 muaj e gjysmë kohë, asaj që të falsifikojë, manipulojë çdo dokument të vjedhjeve të saj kolosale, defakto Gjykata Kushtetuese i dha licencën Edi Ramës të vjedhë pa siklet sa të dojë”, tha Berisha.

Berisha përshëndeti po ashtu protestën e Adriatik Lapajt para Kryeministrisë, të cilën e cilësoi të drejtë.(Maela MARINI).///