Dietat me pak karbohidrate mund të dëmtojnë shëndetin e zemrës në një periudhë afatgjatë

 Një studim i gjerë 30-vjeçar i realizuar nga Universiteti i Harvardit ka zbuluar se dietat me pak karbohidrate mund të kenë pasoja negative për shëndetin e zemrës në një periudhë afatgjatë – sidomos kur ato bazohen në burime jo cilësore të ushqimit.

Për dekada me radhë, dietat me pak karbohidrate dhe ato me pak yndyrë janë promovuar si zgjidhja ideale për humbje peshe dhe përmirësim të shëndetit kardiovaskular.

Miliona njerëz në mbarë botën i kanë ndjekur këto regjime ushqimore me bindjen se reduktimi i karbohidrateve apo yndyrnave ul rrezikun për sëmundje të zemrës.

Megjithatë, gjetjet e reja sugjerojnë se cilësia e ushqimit ka më shumë rëndësi sesa thjesht sasia e makronutrientëve të konsumuar.

Studimi përfshiu rreth 200 mijë profesionistë të shëndetit, të cilët e ndoqën për tre dekada.

Sipas studiuesve, personat që ndoqën dieta “jo të shëndetshme” me pak karbohidrate – të bazuara kryesisht në drithëra të rafinuara, sheqerna të shtuara dhe produkte të përpunuara – regjistruan një rritje prej 14% të rrezikut për zhvillimin e sëmundjeve të zemrës.

Në të kundërt, pjesëmarrësit që konsumuan karbohidrate cilësore, si drithërat integrale, bishtajoret, frutat dhe perimet, shënuan një ulje prej 15% të rrezikut.

Kjo, sipas autorëve të studimit, dëshmon qartë se burimi i kalorive është shumë më i rëndësishëm sesa numri i tyre.

Për të siguruar që rezultatet të mos mbështeteshin vetëm në vetë-raportimet e pjesëmarrësve mbi regjimin e tyre ushqimor, shkencëtarët përdorën teknika të avancuara të metabolomikës për të analizuar mostrat e gjakut të mbi 11 mijë personave.

Këto analiza biologjike ndihmuan në identifikimin e biomarkerëve të lidhur me mënyrën e të ushqyerit dhe rrezikun kardiovaskular.

Të dhënat konfirmuan se yndyrnat e shëndetshme, të marra nga burime si avokado, arrat, farat dhe vajrat bimore, ndihmojnë në mbrojtjen e sistemit kardiovaskular.

Ato kontribuojnë në uljen e inflamacionit, përmirësimin e kolesterolit dhe pastrimin e depozitave në arterie, si dhe mbështesin funksionin hormonal të organizmit.

Nga ana tjetër, yndyrnat e ngopura dhe ushqimet e përpunuara vazhdojnë të jenë të lidhura ngushtë me rritjen e rrezikut për diabet të tipit 2, hipertension dhe sëmundje të zemrës.

Studiuesit paralajmërojnë se një dietë e varfër në karbohidrate, por e pasur me produkte të përpunuara dhe yndyrna të dëmshme, mund të krijojë një ndjenjë të rreme sigurie për shëndetin.

Studimi, i publikuar në revistën shkencore “Journal of the American College of Cardiology”, thekson se për konsumatorët e ndërgjegjjshëm për shëndetin, qasja më efektive nuk është eliminimi ekstrem i një grupi ushqimor, por ndërtimi i një regjimi të balancuar dhe të pasur me ushqime të plota, natyrale dhe të papërpunuara.

Mesazhi kryesor i hulumtimit është i qartë: në vend që të fiksohemi pas numërimit të karbohidrateve, duhet t’i kushtojmë më shumë vëmendje cilësisë së ushqimit që vendosim në pjatë, pasi ky është çelësi për një zemër të shëndetshme dhe jetëgjatësi më të madhe. /(Atila KOTA)///