Gjobiten 6 kompani fruta-perimesh, diktuan çmimet deri në 115% më të larta

Nga Eva XHAJANKA

 Autoriteti i Konkurrencës ka përfunduar një procedurë të thelluar hetimore për tregun e grumbullimit dhe shitjes me shumicë të fruta-perimeve në qarqet Tiranë, Elbasan, Berat, Fier dhe Korçë, e cila ka zgjatur gati dy vite dhe ka përfshirë monitorimin e tregut, hetimin paraprak dhe hetimin e thelluar.

Komisioni i Konkurrencës konstatoi se disa ndërmarrje grumbulluese kanë bashkërenduar çmimet e blerjes gjatë periudhave të sezonit, duke diktuar çmimet në dëm të fermerëve dhe duke aplikuar marzhe shumë të larta fitimi deri në 115%. Ndërmarrjet e përfshira janë Omer Fruit SHPK, Nedrete Arapi PF, Besim Thaqi PF, Morina Grup SHPK, Fruit-To-Zela SHPK dhe Roland-2012 SHPK.

Sipas Autoritetit të Konkurrencës, kjo sjellje përbën marrëveshje të ndaluar sipas ligjit dhe është cilësuar si shkelje e rëndë, për të cilën Komisioni ka vendosur gjoba deri në 0.15% të xhiros së vitit financiar paraardhës për secilën ndërmarrje.

Hetimi tregoi se fermerët shpesh përballeshin me çmime të diktuara dhe të koordinuara, mungesë hapësire për negocim, varësi nga një numër i kufizuar blerësish, presione për uljen e çmimeve dhe vonesa në pagesa.

Në kuadër të masave korrigjuese, Komisioni ka urdhëruar ndërmarrjet e gjobitura të afishojnë në mënyrë të dukshme çmimet aktuale të produkteve që grumbullojnë dhe i ka vendosur ato nën monitorim për një periudhë njëvjeçare.

Gjithashtu, Komisioni i Konkurrencës i ka adresuar Ministrisë së Financave dhe Ministrisë së Bujqësisë dhe Zhvillimit Rural një sërë rekomandimesh për reformimin e tregut, përfshirë minimizimin e informalitetit, krijimin e një baze të re ligjore në përputhje me standardet e Bashkimit Evropian, ngritjen e një platforme kombëtare online të çmimeve dhe vendosjen e kontratave të detyrueshme të standardizuara.///