Grenell: Haga ka dalë jashtë kontrollit pas protestës për Thaçin

 – Ish-i dërguari i posaçëm i SHBA-së për dialogun Kosovë–Serbi, Richard Grenell, ka reaguar pas protestës së mbajtur sot në Tiranë, ku mijëra qytetarë dhe ish-luftëtarë të UÇK-së kërkuan drejtësi për ish-presidentin e Kosovës, Hashim Thaçi, i cili po gjykohet në Dhomat e Specializuara të Kosovës në Hagë.

“Haga ka dalë jashtë kontrollit. Këtë e bëri Jack Smith”., komentoi Grenell në X.

Deklarata e tij vjen pas një vale protestash të ngjashme që janë mbajtur muajt e fundit në  Prishtinë dhe në Hagë, ndërsa procesi ndaj Thaçit dhe ish-zyrtarëve të tjerë të UÇK-së ka hyrë në fazën e mbrojtjes.

Gazetarja Xhorxhina Bami raportoi se protesta e sotme në Tiranë ishte e treta e madhe në një periudhë të shkurtër, duke theksuar pjesëmarrjen e gjerë të qytetarëve dhe thirrjet kundër asaj që protestuesit e quajnë “padrejtësi e Hagës”.

Ndërkohë, aktivisti Fitim Çeku publikoi pamje nga tubimi, duke shkruar se “mijëra qytetarë u mblodhën në Tiranë për të protestuar kundër padrejtësisë në Hagë ndaj Hashim Thaçit”.

Grenell, i cili edhe më parë ka mbajtur qëndrim kritik ndaj prokurorit amerikan Jack Smith,  dikur drejtues i Zyrës së Prokurorit të Specializuar për Kosovën dhe aktualisht prokuror special në SHBA për hetimet ndaj Donald Trump la të kuptohet se sipas tij, mënyra e funksionimit të gjykatës ndaj Thaçit është trashëgimi e metodës së Smith.

Protesta në Tiranë u zhvillua pa incidente dhe u shoqërua me thirrje për lirimin e ish-presidentit Thaçi dhe bashkëluftëtarëve të tij, të cilët akuzohen për krime lufte dhe krime kundër njerëzimit. (Admir ABULE).///