Komisioni i Rithemelimit thirrje për pjesëmarrje në votime: Vota do të mbrohet nga opozita

Kryetari i Komisionit të Rithemelimit pranë Partisë Demokratike, Sali Berisha bëri thirrje sot qytetarëve të shkojnë të votojnë. Në një deklaratë për shtyp nga selia e PD-së, Berisha tha se çdo votë e qytetarëve do të mbrohet nga opozita.

“Falënderoj përzemërsisht të gjithë ata qytetarë shqiptarë që nga ora 7 e mëngjesit e deri në këtë kohë, janë paraqitur dhe kanë hedhur votën e tyre në kutitë e votimit. Kanë kryer pra një detyrë kushtetuese jashtëzakonisht të rëndësishme për vendin, veten dhe familjen e tyre. U bëj thirrje të gjithë qytetarëve që ende nuk kanë votuar të votojnë, të paraqiten në orët në vazhdim pranë qendrave të tyre dhe të votojnë si një shërbim i jashtëzakonshëm që i bëjnë vendit, vetes dhe familjes së tyre. Garantoj qytetarët se opozita po mbikëqyr me sukses të plotë këtë proces. Ajo sot është më e fuqishme se kurrë. Vota e tyre ka mbrojtjen absolute të opozitës shqiptare”, u shpreh Berisha.

Edhe drejtuesi i listës së kandidatëve për këshillin bashkiak Tiranë, Ilir Alimehmeti bëri thirrje për pjesëmarrje në votime, teksa denoncoi edhe parregullsi gjatë ditës së sotme.

“Ka patur përpjekje, ka patur prezencë të punonjësve të bashkisë nëpër qendrat e votimeve, parregullsi, vonesa 2-3 orëshe për shkak të mosfunksionimit nëpër qendra të votimit të pajisjeve të identifikimit elektronik. Të gjitha këto kërkojnë vetëm një gjë, që njerëzit të pengohen, të mos dalin, e të mos votojnë. Gjë tjetër nuk mund të bëjnë. E për këtë arsye, përgjigja juaj ndaj tyre është vetëm një: të dilni masivisht e të votoni”, deklaroi ai.///