Kultivuan kanabis në Lazarat, arrestohen dy shtetas

 Policia e Gjirokastrës ka finalizuar operacionin policor antikanabis të koduar “Kujdesi”, si rezultat të përdorimit edhe të dronëve. Policia ka vënë në pranga 2 shtetas (babai dhe djali), pasi kishin kultivuar dhe prodhuar cannabis sativa, në fshatin Lazarat. Ata u kapën në flagrancë teksa kujdeseshin për bimët narkotike. Gjithashtu është asgjësuar nëpërmjet djegies, bima narkotike dhe është sekuestrohet një sasi lënde narkotike cannabis sativa që u gjet në banesën e 2 të arrestuarve.

Policia e Shtetit njoftoi sot se, si rezultat i administrimit të menjëhershëm të informacioneve të siguruara nga inteligjenca policore, se në një banesë në fshatin Lazarat, kultivoheshin bimë narkotike cannabis sativa, shërbimet e Komisariatit të Policisë Gjirokastër finalizuan operacionin policor të koduar “Kujdesi”, në kuadër të të cilit u vunë në pranga shtetasit A. S., 51 vjeç dhe E. S., 28 vjeç (babai dhe djali), të dy banues në fshatin Lazarat.

Të dy këta shtetas u kapën në flagrancë nga dronë të rezolucionit të lartë, të përdorur në këtë operacion, teksa kujdeseshin për 50 bimët e dyshuara narkotike cannabis sativa që kishin mbjellë në oborrin e banesës së tyre. Si rezultat i kontrolleve të imtësishme në këtë banesë, Policia gjeti një sasi lënde të dyshuar narkotike cannabis sativa. Lënda narkotike u sekuestrua në cilësinë e provës materiale, ndërsa 50 bimët narkotike u asgjësuan nëpërmjet djegies. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.///