Mbërrijnë dozat e para të vaksinave nga kontrata me kompaninë “Pfizer”

Kanë mbërritur mbrëmjen e sotme dozat e para të vaksinave nga kontrata me kompaninë “Pfizer”.

Në aeroportin “Nënë Tereza” është ulur avioni i cili ka bërë të mundur transportimin e 1170 dozave të vaksinës kundër koronavirusit.

Nga aeroporti “Nënë Tereza”, Kryeministri Edi Rama, i shoqëruar edhe nga ministrja e Shëndetësisë dhe Mbrojtjes Sociale, Ogerta Manastirliu dhe ministri i Shtetit për Rindërtim, Arben Ahmetaj, deklaroi se me 1170 dozat e reja nga “Pfizer”, do të vijojë procesi i vaksinimit me mjekët dhe infermierët dhe më pas edhe me të moshuarit.

“Dozat do transportohen menjëherë në Institutin e Shëndetit Publik me të gjitha parametrat e sigurisë, e njëjta gjë siç ndodhi dhe me dozat e tjera. Hapet kutia dhe verifikohen të gjitha parametrat dhe certifikatat dhe direkt futen në zinxhirin ultra të ftohtë në frigoriferët -80 gradë. Prej andej më pas vijon distribucioni për gjithë vaksinimin”, tha Manastirliu.

Manastriliu shtoi se, “praktikisht do jetë në baza sigurie të rrepta pasi dhe Policia e Shtetit do shoqëroj makinën e vaksinave”./atsh///