Memorie. 35 vjet nga rikthimi i lirisë së besimit fetar në qytetin e Shkodrës

35 vjet më parë, shkodranët iu rikthyen besimit fetar, pas 23 vitesh të kaluara në mohimin e Zotit të detyruar nga regjimi komunist.

Në nëntor të vitit 1990, në Shkodër u ringjall liria e besimit fetar, moment të cilin e kujton Drejtoria Rajonale e Trashëgimisë Kulturore Shkodër përmes publikimit të fotove të rralla të fotografit Angjelin Nenshati.

Fotot risjellin ato ditë, ku Shkodra u bë lajmëtarja e parë e ndryshimeve që rrodhën më vonë, ndër to edhe celebrimi i parë fetar në Shqipërinë komuniste.

Pas ndalimit të fesë në vitin 1967 çdo shenjë apo celebrim fetar ishte e ndaluar, por më 4 nëntor 1990, në varrezat katolike të Rrmajit, ndodhi diçka që do të shënonte kthesën e madhe drejt lirisë shpirtërore të shqiptarëve.

Don Simon Jubani kremtoi një meshë të shkurtër në varrezat katolike, për një grup të vogël njerëzish që ndodheshin aty për të kujtuar të afërmit e ndjerë.
Vetëm një javë më pas, më 11 nëntor 1990, u mbajt mesha e parë publike, që mblodhi qindra qytetarë dhe shënoi fundin e heshtjes fetare në vend. / (4 nentor 1990, fotot nga Angjelin Nenshati.) ///