MEMORIE-77-vjetori i çlirimit të Tiranës, ceremoni përkujtimore tek “Ushtari i Panjohur”

77 vjet më parë në 17 nëntor të 1944 Tirana u çlirua nga ushtria gjermane në Luftën e Dytë Botërore. Trupat e brigadës së parë sulmuese të udhëhequra nga Mehmet Shehu çliruan kryeqytetin nga pushtuesit nazistë, pas 19 ditë luftimesh të ashpra.

Nga “Ushtari i Panjohur” ku u zhvillua ceremonia për 77-vjetorin e Çlirimit të Tiranës nënkryetari i bashkisë së Tiranës, Andi Seferi tha se “jemi mbledhur këtu për të nderuar veprën dhe sakrificën e të gjithë patriotëve shqiptarë që 77 vite më parë mposhtën armikun për të na katapultuar triumfues në një epokë të re, me një botë mes kombeve të lira e mbi të gjitha për të mishëruar peshën e aktit të unitetit dhe të bashkimit. Por ka edhe nga ato histeri që duan të na përçajnë, duke dashur të bëjnë bashkë periudhën e errët të komunizmit të pasluftës me periudhën e artë të bashkimit dhe të sakrificës së luftës antifashiste nacional-çlirimtare”.

“Ne si Parti Socialiste bashkë me qytetarët e drejtë që dimë të gjykojmë historinë mbi fakte dhe jo mbi thashetheme dhe llafe. Mënyra më e mirë për të nderuar sakrificën e tyre është që ne të vazhdojmë të qëndrojmë të bashkuar për të ecur përpara në procesin e transformimit të Shqipërisë, të reformave të integrimit evropian si edhe ndërtimin e një shoqërie të lirë, të drejtë dhe të barabartë”, nënvizoi Seferi.

Nënkryetarja e Parlamentit, Ermonela Felaj tha se Tirana është e të gjithëve, prandaj edhe kjo është një ditë shumë e veçantë.

“Tirana nuk është vetëm e tiranasve, Tirana është e të gjithëve, prandaj kjo është një ditë e gëzuar dhe mua mu bë zemra mal që e shikoj këtë shesh me simbolikë të veçantë, të mbushur plot. Monumentin e “Ushtarit të panjohur” nuk e gjejmë vetëm në Tiranë, por e gjejmë në disa kryeqytete në Europës, kjo tregon saktësisht që lufta Nacional Çlirimtare nuk ishte thjeshtë një lufte e partizanëve, por ajo u bë një luftë e të gjithë popullit shqiptar”, u shpreh Felaj.

Kryetari i Këshillit të qarkut Tiranë, Aldrin Dalipi tha se “dhjetëra qytetarë kanë rënë në betejën për çlirimin e Tiranës. Ata i dhanë jetë kombit tonë. Për këtë arsye ne sot jemi krenarë për gjithçka që kemi arritur sepse janë themelet e gjithçkaje në gjakun dhe sakrificën e të rënëve”.

Ndërkohë edhe kryetari i bashkisë së Tiranës, Erion Veliaj, ka uruar 77-vjetorin e çlirimit të Tiranës.

“Sot është dita kur ne nderojmë sakrificën e heronjve, që luftuan për çlirimin e qytetit duke qëndruar të bashkuar e duke punuar për një shoqëri të drejtë dhe të barabartë. “Gëzuar 17 Nëntorin, 77-vjetorin e çlirimit të Tiranës. Sot është dita e Lirisë – dita kur ne nderojmë sakrificën e heronjve, që luftuan për çlirimin e qytetit, duke qëndruar të bashkuar e duke punuar për një shoqëri të drejtë dhe të barabartë”, shprehet Veliaj.