Memorie. Adem DACI, shpirt dhe fisnikëri.

Nga Vangjel AGORA

(Vlerësimi nderues i Këshillit Bashkiak të Sarandës, duke i dhënë emrin e tij Qendrës Kulturore të Fëmijëve, është një akt mirënjohjeje institucionale dhe morale për një muzikant të talentuar, i cili me përkushtim dhe fisnikëri la gjurmë të pashlyeshme në breza.)

Adem Daci ka lindur më 7 dhjetor 1945 në qytetin e Përmetit. Qysh fëmijë në klasën e dytë, i rritur në një mjedis familjar muzikantësh, ku të gjithë pjesëtarët e familjes së tij luanin në instrumente të ndryshëm, Ademin e tërhiqte me shumë kitara. Prej vitit 1960 deri në vitin 1964, para se të kryente shërbimin ushtarak, A. Daci aktivizohej rregullisht në të gjitha koncertet muzikore që organizonte Shtëpia e Kulturës e Përmetit, deri sa një ditë të bukur pranvere të vitit 1968 vjen në qytetin e Sarandës, në përbërje të një ansambli muzikor të Shtëpisë së Kulturës së Përmetit, për të marrë pjesë në një festival që organizohej aty.

Pjesët e ekzekutuara prej tij në kitarë te ky festival lanë mbresa të thella te spektatori i Sarandës, duke tërhequr vëmendjen edhe të drejtuesve të kulturës në qytetet, të cilët i propozuan të bëhej pjesëtar i trupës profesioniste të estradës së Sarandës, të cilën ai e pranoi me kënaqësi.

Kështu në fillim të vitit 1969 filloi punë si kitarist në këtë trupë, deri sa doli në pension në vitin 2010. Kontributi i tij artistik 40 vjeçar është i gjerë dhe i larmishëm, jo vetëm si një kitarist i talentuar, por edhe si një muzikant e krijues, pjesëmarrës në shumë aktivitete muzikore, festivale fëmijësh dhe të rriturish, të organizuara gjatë viteve në qytetin tonë si dhe në qytete të tjerë të vendit. Nëpërmjet kitarës A. Daci u bë një emër i dashur për artdashësit e panumërt duke u përcjellë atyre ndjeshmëri të bukura, elegancë dhe ëmbëlsi tingujsh, duke fituar emër në rang kombëtar përmes turneve të organizuara nga trupa jonë e estradës. Ai ishte gjithkund i pëlqyer dhe i duartrokitur për virtuozitetin e tij në kitarë dhe shpirtin krijues e plot pasion. Mbi telat e kitarës artisti nuk ka derdhur thjesht nota, por një emocion të veçantë të ngjizur me meloditë e kabave përmetare, trazuar me valët e detit Jon dhe ison labe. Brezi i të rinjve gjimnazist të viteve ‘70 në Sarandë, e kujtojnë Ademin si një kitarist plot melodiozitet, që i entuziazmonte me pjesëmarrjen e tij në mbrëmjet rinore të organizuara në ato vite si i vetmi argëtim i kohës.

Adem Daci ka qenë pjesëmarrës në mbi 150 premiera të estradës profesioniste të Sarandës, dhe krijues i disa këngëve të kënduara nga këngëtarët e Estradës. Kontributi i tij shtrihet dhe në shumë aktivitete muzikore të lëvizjes amatore të qytetit si instrumentist, krijues e drejtues muzike. Ka qenë pjesëtar në disa festivale folklorike të vendit, si llautist i talentuar i muzikës popullore, i nderuar edhe me çmime. Ka marrë pjesë gjithashtu në Ansamblin Shtetëror të Këngëve dhe Valleve Popullore si dhe në disa ansamble të tjera të vendit, i përfshirë në turnetë që organizoheshin para viteve ‘90 jashtë shtetit. A. Daci ka qenë një inspirues dhe mësues i dhjetëra kitaristëve të rinj, që kanë dalë nëpër vite në qytetin tonë. Trupa e estradës së Sarandës e ka patur vazhdimisht si pikë kyçe të suksesit në programet dhe turnetë jashtë rrethit. Figura e tij artistike është e shumëfishtë, jo thjesht si një instrumentist dhe muzikant i talentuar, por një individualitet me emër, nga vlerat e rralla të trupës, pa të cilin suksesi i saj nuk mund të kuptohej. Si njeri dhe artist i komunikueshëm dhe i dashur me të gjithë kolegët, ka ndihmuar shumë me shembullin e tij në mirëkuptimin dhe bashkëpunimin krijues brenda kolektivit.

Ademi u nda nga jeta më 12 janar 2022 në moshën 77 vjeçare.

Me tingullin e kitarës së tij, i dha Sarandës jo vetëm melodi, por shpirt, finesë dhe identitet artistik.

Emri Adem Daci sot nuk është vetëm kujtim, por frymëzim i gjallë për fëmijët dhe të rinjtë që do të rriten me artin dhe muzikën.

Saranda e njohu bukurinë e tingujve të kitarës në vitet 70 falë mjeshtërisë së Adem Dacit, ndërsa ai nëpërmjet kitarës së tij e bëri të njohur Sarandën në gjithë vendin…///