Ndalohet 53-vjeçari grek në Kakavijë, po kalonte kufirin me 18 150 euro të padeklaruara

 Policia e Gjirokastrës njoftoi sot, se ka vendosur nën hetim një shtetas grekë, pasi u kap në pikën kufitare të Kakavijës në tentativë për të dalë nga Shqipëria me 18 150 euro të padeklaruara. Sipas njoftimit të policisë, 53-vjeçari i kishte fshehur eurot në makinë.

“Si rezultat i angazhimit maksimal të shërbimeve të Policisë Kufitare të PKK Kakavije, në bashkëpunim me autoritetet doganore, për parandalimin dhe goditjen e krimeve kufitare, krahas punës për ofrimin e një shërbimi cilësor dhe etik, qytetarëve në hyrje/dalje, është konstatuar dhe goditur 1 rast i mosdeklarimit të të hollave”, njofton Policia.

“Në bazë të analizave të riskut, në dalje të vendit, u kalua për kontroll në vijë të dytë, automjeti me drejtues shtetasin grek E. R., në të cilin, gjatë kontrollit u gjetën të fshehura 18 150 euro që ky shtetas po tentonte t’i nxirrte nga vendi ynë, pa i deklaruar siç e përcakton ligji”, vijon njoftimi.

“Në vijim të veprimeve procedurale për këtë rast, u referuan materialet në Prokurori ku nisi procedimi në gjendje të lirë për shtetasin E. R., 53 vjeç, banues në Greqi, si dhe u sekuestrua shuma e parave”, përfundon njoftimi i Policisë së Gjirokastrës.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

1 nga 3