Ndërron jetë aktori i njohur Anastas Kristofori

Aktori i njohur Anastas Kristofori ndërroi jetë sot në moshën 78-vjeçare.

Kristofori me një karrierë të pasur artistike u bë i njohur veçanërisht për rolin e Perikliut në komedinë “Pallati 176”.

Kristofori lindi më 28 nëntor të vitit 1943 në fshatin Vuno të rrethit të Vlorës. Pas mbarimit të studimeve të larta në Institutin e Lartë të Arteve (Akademia e Arteve) në vitin 1970, filloi punën me Trupën Profesioniste të Teatrit Popullor (Teatri Kombëtar) në vitin 1971. Të shumtë do të jenë interpretimet e tij në skenën e këtij teatri. Këtu mund të përmendim rolin e zotit Dëllfit në dramën “Arturo Ui” të Bertold Brehtit, roli i sekretarit të Prefektit në dramën “Prefekti” e Besim Levonjës, rolin e Apostolit në dramën “Komunistët” e Ruzhdi Pulahës, rolin e Perikliut në komedinë “Pallati 176” e Adelina Balashit e shumë të tjera.

Roli i tij më i fundit do të jetë në vitin 2009 në teledramën “Burgjet plot, liria në derë”. Në kinematografi roli i tij i parë ishte në vitin 1976 roli i Stavrit, Ekonomatit të Strehës Vorfnore në filmin “Lulëkuqet mbi mure” më tej do të vazhdonin edhe role të tjera si psh: roli i Ndoc Markut në filmin “Besa e kuqe” në vitin 1982, rolin e Antonios, Kuestorit të Tiranës në filmin “Vendimi” në vitin 1984, rolin e Mavrojanis në filmin “Misioni përtej detit” në vitin 1988 etj.

Roli i tij më i fundit do të jetë roli i Perikliut në kinodramën “Po vjen Ai” në vitin 1998, një vazhdim televiziv i komedisë së njohur “Pallati 176” i Adelina Balashit. Për meritat e tij artistike Anastas Kristofori është vlerësuar me titullin e lartë “Artist i Merituar”.

Disa nga pjesë teatrale ku ka interpretuar janë:

Viti 61
Toka jonë
Prefekti
Pallati 176 – (1985)
Një dimër i shkurtër
Komunistët
Familja e peshkatarit
Duke gdhirë viti 45”
Shënomeni dhe mua
Nën dritat e skenës.
Shkallët
Gjenerali i ushtrisë së vdekur.
Bashkë me agimin
Arturo Ui
Stinë e mërzitshme në Olimp
Rreshajet
Burgjet plot, liria në derë
Darka e gabuar///