Në strategjinë e zhvillimit të turizmit/ Bypass-i i Vlorës, ndër veprat më spektakolare të infrastrukturës, gati sezonin e ardhshëm

-Në bypass-in e Vlorës, një prej veprave më spektakolare të infrastrukturës kombëtare, po punohet me ritme të larta për ndërtimin e tij.

Kryeministri Edi Rama inspektoi sot punimet në këtë bypass, i shoqëruar nga ministrja e Infrastrukturës dhe Energjisë, Belinda Balluku dhe kryetari i bashkisë së Vlorës, Dritan Leli.

Gjatë inspektimit Kryeministri Rama tha se “në kantierin e bypass-it prej muajsh punohet me tre turne, për të përmbyllur një prej veprave më spektakolare të infrastrukturës sonë kombëtare, e cila jo vetëm e afron bregdetin jonian për turistët dhe nxit zhvillimin e një tjetër zone plot potenciale, por do të ofrojë edhe një udhëtim panoramik të llojit më të bukur”.

Kreu i qeverisë e cilësoi këtë rrugë, një segment kyç në strategjinë e zhvillimit të turizmit.

Po ashtu Kryeministri Rama bëri të ditur se “bypass-i do të jetë gati para nisjes së sezonit të ardhshëm turistik”.

Ministrja Balluku u shpreh se “puna ka ecur shumë mirë, falë edhe kohës së mirë që ka mbajtur. Kompania nuk e ka ndërprerë punën dhe ecuria e punimeve është e kënaqshme, 60% tani, duke marrë parasysh pengesën në zonën e Kaninës për shkak të disa pronave që janë në shpronësim. Autoriteti Rrugor Shqiptar po i ndihmon për të bërë dosjet. Kemi bërë shpronësimin e vlerës 60 milionë deri tani dhe do vazhdojmë me dosjet e tjera”.

Inxhinieri i firmës që ndjek punimet, tha se “po përfundohen urat që po ndërtohen në këtë bypass. Urat 1 dhe 5 kanë përfunduar dhe janë vetëm për shtresat asfaltike”./atsh///