Një vizitë në burgun grek të Koridhialosit në Athinë. Shqipëri-Greqi, axhendë të përbashkët për riintergrimin e të dënuarve

 Ministri i Drejtësisë Ulsi Manja, i shoqëruar nga zëvendësministri grek i Mbrojtjes së Qytetarit, Lefteris Ikonomu, ka zhvilluar sot një vizitë në burgun grek të Koridhialosit në Athinë. Manja shprehet se takuam një përfaqësi të të dënuarve shqiptarë mes tyre edhe gra të dënuara, me të cilët folëm hapur për kushtet dhe trajtimin e tyre në burgun e Koridhialos.

“Menaxhimi i sistemit të burgjeve ka problematikat e veta, si në Shqipëri ashtu edhe në Greqi, por ekziston vullneti i përbashkët për të garantuar standardet më të larta evropiane për trajtimin e të dënuarve dhe të paraburgosurve në të dy vendet tona”, tha Manja.

Ministri theksoi se u dakordësua për një axhendë të përbashkët për të punuar me programe edukimi dhe rehabilitimi me qëllim risocializimin dhe riintegrimin e tyre të shpejtë në shoqëri.//