“Paqe për Ukrainën”, qirinj dhe homazhe në sheshin ‘Skënderbej’

– Si çdo vit, edhe mbrëmja e kësaj të shtune, e fundit për muajin  Mars, iu kushtua shtëpisë tonë të përbashkët, Tokës.

Së bashku me mbi 3 miliardë njerëz dhe mijëra qytete të tjera në botë, “Tirana Kryeqyteti Evropian i Rinisë 2022”, Kongresi Rinor Kombëtar dhe Bashkia e Tiranës iu bashkua lëvizjes për Planetin Tokë, për të ardhmen tonë.

Këtë vit, Ora e Tokës vjen në një kohë kritike për njerëzit dhe një vend të lirë si Ukraina.

Ndaj të rinjtë, por edhe qytetarë të shumtë u mblodhën mbrëmjem e sotme në sheshin “Skënderbej”, në shenjë solidariteti për paqe në planetin Tokë në këtë periudhë të vështirë.

I pranishëm ishte edhe kryebashkiaku Erion Veliaj ndërsa të rinjtë krijuan në shesh flamurin e Ukrainës me mbi 60 qirinj dhe me mbishkrimin, “Paqe për Ukrainën” (Peace for Ukraine).

Kryeministri Edi Rama, publikoi foto nga kjo nismë e mbajtur në kryeqytet. “Qytetarët në Sheshin Skënderbej duke ndezur qirinj për jetët e humbura nga lufta në Ukrainë”, u shpreh Rama.

Nisma “Earth Hour” e ka zanafillën në 2007 në Sidnei dhe u propozua nga “World Wilde Life Fund”. Dhjetëra kryeqytete të botës iu bashkuan projektit duke fikur për një orë dritat në zyrat qeveritare apo pikat turistike dhe simbolet shtetërore.///