PD , Ina Zhupa padit në SPAK Sekretarin e Përgjithshëm të Kryeministrisë

Partia Demokratike ka paditur në SPAK, Sekretarin e Përgjithshëm të kryeministrisë, Ëngjëll Agaçi.

Në një deklaratë për mediet, zëdhënësja e Partisë Demokratike, Ina Zhupa deklaroi se provat që PD ka paraqitur në një padi penale në SPAK, lidhen me Ëngjëll Agaçin për inceneratorin e Elbasanit.

Duke pretenduar se ka fakte që provojnë shkelje, Zhupa shprehet se “në momentin që Engjëll Agaçi vihet në dijeni, është një shkresë e cila vjen nga Agjencia e Prokurimeve Publike, ishte vënë në lëvizje nga një shkresë e dërguar nga ish-ministri Lefter Koka në datën 11.11.2014. Në këtë shkresë Koka i kërkonte mendim APP-së në lidhje me atë që kishte zgjedhur për procedurën për koncesionin, për partneritetin publik privat, për Elbasanin. Një procedurë me negocim pa shpallje, i kërkonte mendim sipas rregullit. APP-ja po vononte për përgjigje dhe ish-ministri Koka i dërgon një letër të dytë. Letrën e dytë e dërgon në datën 17.11.2014 dhe ky institucion i kthen përgjigje me datë 18.11.2014, për dijeni të së cilës është edhe Ëngjëll Agaçi. Dhe nuk është rastësisht, sepse APP-ja është në varësi të Këshillit të Ministrave dhe sekretari i Përgjithshëm i Këshillit të Ministrave e ka në përgjegjësi të institucionit dhe duhet të jetë i informuar për ligjshmërinë e projektakteve që duhet të kalojnë në Këshillin e Ministrave”.

“Në përgjigje APP thotë “ Ligji nuk njeh asnjë procedurë tjetër përveç tre procedurave ligjore që janë; e hapur, e kufizuar dhe procedurë me negocim me shpallje paraprake. Kjo që ju kërkoni (ministri Koka), është një procedurë që nuk e njeh ligji, një procedurë jo ligjore”. Dhe Ëngjëll Agaçi ishte në dijeni të plotë të kësaj shkrese”, tha Zhupa.///