Rritet numri i aksidenteve, shkak sjellja e drejtuesve të mjeteve

Numri i aksidenteve në gjysmën e parë të këtij viti shënoi rritje, krahasuar me të njëjtën periudhë të vitit 2020.

Sipas raportit të publikuar nga INSTAT, gjatë periudhës janar-qershor të këtij viti numërohen 671 aksidente rrugore nga 505 aksidente të ndodhura në gjashtëmujorin e parë të vitit 2020.

INSTAT shpjegon se numri i ulët i aksidenteve të shënuara përgjatë 6-mujorit të parë të 2020-s, lidhet me masat kufizuese në qarkullim për shkak të pandemisë së COVID-19.

Referuar të dhënave, në gjashtëmujorin e parë të vitit 2021, numri i të aksidentuarve është 875 persona, nga 656 persona në gjashtëmujorin e parë të vitit 2020. Ndërsa numri i të vdekurve nga aksidentet rrugore është 105 persona, nga 74 persona të vdekur në të njëjtën periudhë të një viti më parë.

Në këtë periudhë, 553 aksidente u shkaktuan për shkak të sjelljes së drejtuesit të mjetit, ndërsa 118 aksidente rrugore kanë ndodhur si pasojë e sjelljes së këmbësorit.//atsh///