Rritja e çmimit të naftës, Rama: Po bëhet luftë, s’është i mundur kontrolli i çmimeve nga qeveria

Kryeministri Edi Rama, i është përgjigjur një ndjekësi në rrjetet sociale, mbi rritjen e çmimeve në vend, konkretisht për naftën dhe miellin.Kryeministri është pyetur nga ndjekësi se çfarë po ndodh me çmimin e naftës dhe të miellit? Si është e mundur që nuk ka një kontroll për këto gjëra s’është e drejtë të rriten çmimet në çdo sekondë, duhet të keni një zgjidhje për këtë?

Në përgjigjen e tij Rama ka sjellë në vëmendje se po bëhet luftë, luftë prej vërteti, luftë me bomba e me viktima e me plagë të jashtëzakonshme, kjo po ndodh dhe po të ishte i mundur kontrolli i çmimeve nga qeveria, do e kishe ndonjë qeveri në Evropë ku çmimet po rriten edhe më frikshëm se këtu.

Rama tha se , “ndërkohë që këtu nuk po rritet ende energjia elektrike, pikërisht sepse shteti që e shet dhe e blen energjinë, ndryshe nga nafta e mielli e tërë të tjerat që shiten e blihen nga privatët, po e mban me dhëmbë kur i thonë llafit pikërisht që të lehtësojë sadopak familjarët”

Kryeministri theksoi se, “s’është e drejtë kjo nuk diskutohet, po s’ka si të mos ndodhë në këto kushte alarmi në të gjitha tregjet dhe me sanksionet ndaj Rusisë që është eksportuesi më i madh në Evropë i gazi, naftës dhe grurit, por ama nga ana tjetër s’ka se si të mos e marrim edhe ne bashkë me terë të tjerët, një pjesë të barrës së luftës së ukrainasve kundër një agresioni ushtarak mbi shtetin e tyre sovran e demokratik, sepse historia na ka mësuar më shumë se një herë që kush mbyll sytë kur i vjen tjetrit, lufta në shtëpinë e vet, shumë shpejt e ka luftën në shtëpinë e tij!”.///