Sarandë-Arrestohet shpërndarësi i lëndëve narkotike

 Policia e Sarandës finalizoi me sukses operacionin policor të koduar “Gjashta”, për goditjen e veprimtarisë kriminale në fushën e narkotikëve. Në kuadër të këtij operacioni u arrestua në flagrancë 1 shtetas që shpërndante lëndë narkotike cannabis sativa në doza të vogla.

Gjithashtu u sekuestruan 3 kilogramë lëndë narkotike cannabis sativa, një pjesë e saj e ndarë në doza, 8.100 euro, 350.000 lekë të rinj, një automjet dhe një aparat celular.

Shërbimet e Komisariatit të Policisë Sarandë, bazuar në informacionet e grumbulluara në rrugë operative për një shtetas që shpërndante lëndë narkotike, në afërsi të shkollës në fshatin Gjashtë dhe në qytetin e Sarandës, kanë organizuar punën dhe në bashkëpunim me Drejtorinë Vendore të Policisë Vlorë, kanë finalizuar operacionin policor të koduar “Gjashta”.

Në kuadër të këtij operacioni u bë kapja dhe arrestimi në flagrancë i shtetasit A. H., 29 vjeç, banues në fshatin Gjashtë, Sarandë.

Gjatë kontrollit fizik ndaj shtetasit A. H. dhe kontrollit fizik në banesën e tij,  shërbimet e Policisë gjetën dhe sekuestruan në cilësinë e provës materiale 3 kilogramë lëndë narkotike të  dyshuar cannabis sativa, një pjesë e saj e ndarë në doza gati për shitje, 8.100 euro, 350.000 lekë të rinj,  një automjet dhe një aparat celular.

Materialet do t’i kalojnë Prokurorisë pranë Gjykatës së Shkallës së Parë Sarandë,  për veprime të mëtejshme, për veprën penale “Prodhimi dhe shitja e lëndëve narkotike”///