Sarandë: Shpallen në kërkim dy inspektorë të IMT për shpërdorim detyre

 Policia e Shtetit vijon operacionin policor të koduar “Heshtja” në qytetin e Sarandës duke shpallur në kërkim dy inspektorë të IMT në Sarandë.

Më parë, në kuadër të operacionit policor të koduar “Heshtja”, u arrestua kryeinspektorja e IMT, si dhe u shpall në kërkim shtetasi P. P., 66 vjeç.

“Në vijim të operacionit policor të koduar “HESHTJA”, për goditjen e aktivitetit të kundërligjshëm në fushën e ndërtimeve pa leje në qytetin e Sarandës, specialistët për Hetimin e Krimit në Komisariatin e Policisë Sarandë bënë shpalljen në kërkim të shtetasve M. A., 30 vjeç, dhe N. J., 26 vjeç, banues në Sarandë, me detyrë Inspektor në Inspektoriatin Vendor të Mbrojtjes së Territorit, pranë Bashkisë Sarandë. Pasi janë siguruar prova ligjore në lidhje me ndërtimin e paligjshëm të një pallati 7- katësh ende të papërfunduar por edhe disa shtesa pa leje, në disa pallate në ndërtim, Gjykata e Rrethit Gjyqësor Sarandë me vendimin Nr.21, datë 24.02.2022, ka vendosur për këta dy shtetas, masat e sigurisë në mungesë “Arrest në burg”, për veprën penale “Shpërdorimi i detyrës”, Të dy këta shtetas dyshohet se me veprimet/mosveprimet e tyre kanë lejuar ndërtimet pa leje në zona të ndryshme në qytetin e Sarandës, në bashkëpunim me kryeinspektoren e IMT R. P., e arrestuar me datë 21.02.2022, për veprën penale “Shpërdorimi i detyrës”, thuhet në njoftim.

Materialet iu referuan Prokurorisë së Rrethit Gjyqësor Sarandë, për veprime të mëtejshme.//atsh/