Shqipëria dhe Greqia drejt njohjes së diplomave

Universiteti i Gjirokastrës “Eqrem Çabej” dhe Universiteti i Janinës nënshkruan një protokoll bashkëpunimi.

Përmes këtij protokolli do të nxitet modernizimi i programeve universitare, punën kërkimore shkencore, shkëmbimin e studentëve dhe pedagogëve, si dhe pjesëmarrjen në programe të përbashkëta evropiane dhe ndërkombëtare.

Në nënshkrimin e marrëveshjes ishte e pranishme ministrja e Arsimit dhe Sportit, Evis Kushi, zv/ministrja e Jashtme Artemis Malo, zv/ministri grek i Arsimit Angelos Syrygos, kryetari i bashkisë Gjirokastër, Flamur Golemi, prefekti Odise Kote, rektori i universitetit të Gjirokastrës Bektash Mema e ai i Janinës Triantafyllos Almpanis, pedagogë, studentë etj.

Kushi shprehu besimin se ky bashkëpunim do të sjellë jo vetëm zhvillim akademik e universitar, por do të ketë impakt edhe në zhvillimin social, kulturor dhe ekonomik për Gjirokastrën dhe gjithë rajonin.

Ndërsa kryebashkiaku Golemi tha se “këto dy institucione arsimore janë një pasuri e madhe e dy qyteteve tona dhe një urë më tepër komunikimi. Dija dhe shkenca nuk kanë kufij prandaj forcimi i lidhjeve dhe i ndërveprimit i bën mirë sjell veç të mira”.

“Nuk e shoh fare të largët e as të pamundur ditën që të ketë një diplomë të vetme pavarësisht se ku studion në Gjirokastër apo në Janinë. Kjo nuk është marrëveshja e parë dhe me siguri as e fundit që nënshkruhet mes dy universiteteve tona. Uroj shumë që t’i orientojmë energjitë tona më tepër te zbatimi i këtyre marrëveshjeve për të parë impaktin real të tyre”, tha Golemi.

Prefekti Kote u shpreh se “ndërkombëtarizimi i universiteteve do të rrisë cilësinë e studimeve, standardin akademik dhe integrimin e shpejtë drejt Bashkimit Evropian”.///