“Shqipëria ime”/ Konkurs pikture për nxënësit në prag të Festave të Nëntorit

Në prag të Festave të Nëntorit, Ministria e Arsimit, Sportit dhe Rinisë do të çelë konkursin e pikturës “Shqipëria ime”.Ministrja e Arsimit, Sportit dhe Rinisë, Evis Kushi u shpreh sot se “çdo nxënës nga i gjithë vendi është i ftuar të marrë pjesë duke dërguar foton e pikturës së tij, që përcjell një peizazh apo një moment të veçantë nga vendi ynë i mrekullueshëm e me plot bukuri”.“Foton e pikturës jeni të lutur ta dërgoni në adresën e e-mailit media@arsimi.gov.al deri më datë 5 nëntor 2020 (ora 20:00) bashkë me të dhënat tuaja kryesore (emër, mbiemër, klasa, shkolla, qyteti)”, tha Kushi.Ndërkohë, ajo informoi se “nga data 6-15 nëntor do të publikojmë 3 albume të ndryshme, në të cilat do të përfshihen fotot e pikturave të dërguara dhe të ndara sipas cikleve (arsim fillor, arsimi i mesëm i ulët, arsim i mesëm i lartë)”.“Piktura që do të marrë më shumë pëlqime në secilin album do të jetë edhe fituesja. Pra në total do të kemi 3 piktura për të cilat do të akordohet nga një çmim simbolik”, tha ajo.