Vlorë e Sarandë, 6654 gjoba dhe 6 shoferë të arrestuar në 20 ditë

 Policia Rrugore e Vlorës dhe ajo e Sarandës kanë arrestuar 6 drejtues automjetesh dhe kanë vendosur 6654 gjoba në 20 ditët e fundit. Sipas njoftimit të Policisë Vendore Vlorë, kontrollet janë zhvilluar përgjatë 24 orëve në 7 ditët e javës, në të gjitha akset rrugore të qarkut, me qëllim rritjen e parametrave të sigurisë rrugore.

“Në kuadër të Plan-Operacionit ROADPOL, për konstatimin, verifikimin dhe ndëshkimin e drejtuesve të mjeteve që përdorin celularin gjatë drejtimit të mjetit, janë vendosur 63 masa administrative. Për periudhën 04.03.2024 – 24.03.2024, janë vënë arrestuar 6 drejtues mjetesh, për drejtim mjeti në gjendje të dehur/pa leje drejtimi, si dhe janë vendosur në total 6654 masa administrative”, bën të ditur Policia e Vlorës.

Sipas njoftimit, “3395 gjoba janë vendosur për qarkullim me shpejtësi tej normave të lejuara; 293 për mospërdorimin e rripit të sigurimit; 374 për parakalime të gabuara; 76 për xhama të errësuar; 2516 për shkelje të ndryshme të Kodit Rrugor.”

Policia e Vlorës bën apel për zbatimin e rregullave të qarkullimit rrugor. “Kallëzoni në numrin pa pagesë 112, çdo rast të shkeljes së tyre. Kontrollet e shërbimeve të Policisë Rrugore, me pajisje të logjistikës bashkëkohore, kanë si qëllim: Parandalimin e aksidenteve rrugore me pasoja për jetën e përdoruesve të rrugës; Rritjen e parametrave të sigurisë rrugore dhe lehtësimin e qarkullimit në qytet dhe në akset lidhëse”, përfundon njoftimi i Policisë së Vlorës./A.Fortuzi///