Rijetësimi i aeroportit të Gjirokastrës- Golemi për ATSH-në: Fluturime turistike dhe sportive në funksion të zhvillimit

Rijetësimi i aeroportit të Gjirokastrës, është një prej prioriteteve të bashkisë, në funksion të zhvillimit të turizmit.

Rikthimi në funksion i aeroportit mbi 80-vjeçar të Gjirokastrës, është një ndër projektet që synon të marrë jetë në qytetin e gurtë, kjo për vetë pozicionin gjeografik dhe potencialin turistik.Aktualisht po ndërhyhet për sistemimin e pistës së aerodromit, në shërbim të fluturimeve turistike dhe sportive.

Kryetari i bashkisë së Gjirokastrës Flamur Golemi tha sot për ATSH-në se “në nisje të sezonit turistik po kryejmë punime në mjediset e aerodromit për mirëmbajtjen e pistës së tij, duke mundësuar fluturimet turistike dhe sportive”.

“Vendosja në funksionim e këtij aeroporti, ka ndikim të rëndësishëm në jetën social-ekonomike, të rajonit të Gjirokastrës”, – theksoi Golemi.Kryebashkiaku Golemi u shpreh se rijetësimi i aeroportit të Gjirokastrës do t’i vijë në ndihmë zhvillimit të biznesit prodhues, tregtar, etj që operon aktualisht në këtë zonë si dhe shkëmbimeve në fusha të ndryshme.

Aeroporti i Gjirokastrës ka një histori gati njëshekullore. Fluturimet e rregullta në të kanë nisur zyrtarisht në vitin 1929 me linjën ajrore Tiranë-Gjirokastër-Tiranë. Në funksion të vetë zhvillimeve historike, politike, sociale, ekonomike, etj të vendit tonë edhe fluturimet në aeroportin e Gjirokastrës do të ishin ato për transportin e pasagjerëve, postës, fluturime për qëllime ushtarake, tregtare, diplomatike, madje edhe në rastet e emergjencave civile.

Qyteti i gurtë tashmë është pjesë e Listës së Trashëgimisë Kulturore Botërore nën Mbrojtjen e UNESCO-s, duke bërë që Gjirokastra të jetë një nga qendrat më të rëndësishme të turizmit kulturor gjithëvjetor, me një rritje të vizitorëve nga viti në vit.Afërsia gjeografike me Sarandën dhe bregdetin e Jonit do të bënte që turistët që do të mbërrijnë në Gjirokastër me linjat ajrore krahas vlerave të qytetit të gurtë të zgjerojnë guidat e tyre edhe me udhëtime në pjesën e bregdetit.

Aeroporti i Gjirokastrës ndodhet në një distancë prej më pak se 1 km nga ana lindore e qytetit dhe shumë afër rrugës nacionale.///