INSTAT: Zarzavatet u rritën me mbi 10%

 Inflacioni, që mat ndryshimin vjetor të çmimit të mallrave, llogaritet 1,8 % gjatë muajit maj. Rritja e çmimeve u ndikua kryesisht nga rritja me mbi 10% e zarzavateve dhe grupit të vajrave dhe yndyrnave.

Sipas INSTAT, një vit më parë ky ndryshim ishte 2,1 %, ndërsa ndryshimi mujor i indeksit të çmimeve të konsumit është -0,9 %.

Krahasuar me muajin maj 2020, rritja më e madhe e çmimeve vërehet në grupin e ushqimeve dhe pije joalkoolikeve, me 3,7 %, pasuar nga ai i komunikimit me 2,8 %, dhe transportit me 2,2 %,

Rritje shënuan edhe çmimet e pijeve alkoolike dhe duhanit me 1,5 %, argëtimit dhe kulturës me 1,4 %, dhe hoteleve, kafeve dhe restoranteve me 1,1 %.

Brenda grupit të ushqimeve çmimet e zarzavateve përfshirë patatet” u rritën me 10,1 %, pasuar nga grupi i vajrave dhe yndyrnave me 6,2 %, dhe frutave me 4 %.

Ndërsa krahasuar me muajin prill, çmimet e ushqimeve dhe pijeve joalkoolike u ulën me 2,8 %, pasuar nga grupi “argëtim dhe kulturë” me 0,3 % dhe pije alkoolike dhe duhan me 0,1 %.///