Basha: Energjia: Krizë korrupsioni dhe keqmenaxhimi

Kryetari i PD-së Lulzim deklaroi te premten se kryeministri Edi Rama, i bën presion qytetarëve për të rritur çmimin e energjisë.

Sipas Bashës, kjo nuk është një krizë energjie, por një krizë korrupsioni e qeverisë.

Në një konferencë për mediet, Basha tha se “qëllimi i tij, i vërtetë ishte dhe është krijimi i kushteve psikologjike dhe i presionit tek njerëzit për atë që ai planifikon të bëjë për rritjen e çmimit të energjisë”.

“U përpoq sërish ta krahasonte situatën me vendet e tjera, por nuk ka asnjë paralelizëm mes asaj që po ndodh përkohësisht në Evropë dhe situatës energjetike në Shqipëri, tani dhe tash 8 vite. Edhe përpjekja megalomane, me të cilën jemi mësuar tashmë për t’i qarë hallin kalorësit, pra vendeve të G7-të, pra vendeve me të pasura të botës, për të justifikuar atë që ky ka në plan të bëjë me çmimin e energjisë këtu, në një ndër vendet më të varfra të botës dhe të Evropës, është një teatër i pështirë mashtrimesh për të dezinformuar opinionin publik, pra për t’ju gënjyer ju nëna e baballarë, të rinj e të reja, fëmijët tuaj për të bërë të duket se rritja e çmimeve qenka e pashmangshme. Në fakt nuk është kështu. Kjo nuk është një krizë energjetike, kjo është krizë korrupsioni dhe keqmenaxhimi me shkak dhe me plan”, tha ai.

Basha shtoi se bilancet e operatorëve të energjisë tregojnë se si në verë shesin me çmim të ulët energjinë e prodhuar nga uji, nga burimet hidrike dhe e blejnë me 3-4-fish çmimin pak muaj më vonë, në tendera korruptivë me taksat që ua mbledhin qytetarëve.

“E kam thënë dhe  e përsëris OSHEE dhe KESH janë ndërmarrje të  zhytura në korrupsion dhe klientelizëm. Mjaftojnë raportimet e fundit ne media për t’i çjerrë maskën asaj që po ndodh të paktën me tre tendera të furnizimit të tregut të lirë të energjisë, ku çmimi i blerjes së energjisë s’është shumë më i lartë sesa çmimi i bursës. Për të tre këta tendera diferenca është 10 milionë euro. Nuk ka thatësirë por ka një bollëk për Edi Ramën dhe hajdutët e OSHE-së prej 10 milionë euro të pajustifikuara midis çmimit të tregut dhe sa e blejnë këta energjinë”, tha ai.///