Inva Mula dhe vajza e saj mesazh sensibilizues për sigurinë rrugore

Fushatës së Drejtorisë së Përgjithshme të Shërbimit të Transportit Rrugor i është bashkuar në rolin e ambasadores së sigurisë rrugore një nga figurat më përfaqësuese të Shqipërisë, sopranoja me famë ndërkombëtare, Inva Mula, e cila bashkë me vajzën e saj Nina sjellin një mesazh sensibilizimi për ndërgjegjësimin e shoferëve dhe pasagjerëve për një udhëtim të sigurt.

Sipas statistikave, të rinjtë e grupmoshës 17-34 vjeç kanë përqindjen më të ulët të përdorimit të rripit të sigurimit, kombinuar me përqindjen më të lartë të aksidenteve në rrugë.

“Ende befasohem kur shoh persona që nuk e përdorin rripin e sigurimit dhe janë pikërisht të rinjtë që nuk e vendosin. Rripi shpëton jetë. Jeta është shumë e bukur për ta rrezikuar atë. Të gjithë mund të luajmë një rol për sigurinë rrugore. Vendos rripin, shpëto jetë“, është mesazhi që përcjellin Inva dhe vajza e saj, Nina.

DPSHTRR bën të ditur se vetëm vendosja e rripit të sigurimit zvogëlon me 50 % dëmtimet fatale në rast aksidenti.

“Është koha të kujdesemi për sigurinë tonë dhe të zbatojmë të gjitha rregullat dhe udhëzimet të cilat janë jetësore për të gjithë përdoruesit e rrugës”, thuhet në mesazhin e sensibilizimit.///