Shqipëria fiton 1-0 ndaj Andorrës

Kombëtarja shqiptare e futbollit fitoi mbrëmjen e sotme 1-0 përballë Andorrës në ndeshjen e zhvilluar në stadiumin “Air Albania” në Tiranë, e vlefshme për kualifikueset e kampionatit botëror “Katar 2022”.

Ndeshja e sotme u vendos nga një 11-metërsh në minutën e 73-të i shndërruar në gol nga mesfushori Endri Çekiçi.

Shqipëria vinte në këtë sfidë me shumë mungesa dhe pas humbjes 5-0 ndaj Anglisë në Londër.

Trajneri i kombëtares, Edoardo Reja bëri disa ndryshime në 11-shen titullare për shkak të lojtarëve të dëmtuar apo të pezulluar. Kështu, nga ndeshja e kaluar në formacion u konfirmuan vetëm tre lojtarë Strakosha, Hysaj dhe Uzuni.

Ndërkohë, nga minuta e parë një fanellë titullari i është besuar dy lojtarëve të Tiranës, Erjon Hoxhallari dhe Taulant Seferi, ndërkohë që në mbrojtje u rreshtuan  Dermaku dhe Mihaj.

Në mesfushë u aktivizua Ramadani dhe Qazim Laçi. Në krah luanin Odise Roshi dhe Endri Çekiçi.

Në 45 minutat e para, megjithë insistimin e futbollistëve kuqezinj nuk u bë i mundur ndryshimi i rezultatit, teksa rasti më i mirë erdhi në minutën e 45-të, ku pas një krosimi të bukur të Erjon Hoxhallarit nga e majta, Odise Roshi u zhyt me kokë, por topi u përplas në shtyllë.

Ndërsa në pjesën e dytë, momenti kulmor I ndeshjes erdhi në minutën e 72-të, kur pas një kontakti në zonë mes Uzunit dhe mbrojtësit të Andorrës, për arbitrin nuk kishte dyshime dhe akordoi 11-metërsh. Më pas Çekiçi nuk gaboi nga pika e bardhë.

Kjo fitore e lë Shqipërinë në vendin e tretë në grupin I, me 18 pikë, duke lënë kështu pas Hungarinë me 17 pikë e cila fitoi sonte 1-2 ndaj Polonisë, Andorrën me 6 pikë dhe San Marinon me 0 pikë.

Grupi kryesohet nga Anglia me 26 pikë, e cila fitoi sonte 0-10 ndaj San Marinos dhe u kualifikua për në botërorin “Katar 2022”. Polonia u rendit e dyta me 20 pikë dhe shkon në play off.

Shqipëri- Andorra 1-0

Formacioni i Shqipërisë (3-5-2): Strakosha, Dermaku, Mihaj, Hoxhallari, Hysaj, Ramadani, Laçi, Çekiçi, Roshi, Seferi, Uzuni

Formacioni i Andorrës (5-4-1): Gomes, Cervos, Jimezes, Garcia, Lloveras, San Nicolas, Jordi Alaez, Pujol, Vieira, Martinez, Rosas Ubach.///