Rama: Tabaku recidiviste për shpifje, padi kur të mbarojë hetimi nga SPAK

Kryeministri Edi Rama deklaroi te merkuren në një prononcim për mediet nga kryesia e Kuvendit, pasi dëshmoi në komisionin hetimor për impiantet e trajtimit të mbetjeve se, do të padisë për shpifje Jorida Tabakun pasi të mbarojë hetimi nga SPAK-u për këtë çështje

I pyetur nëse do të bëjë padi për akuzat për grup të strukturuar kriminal, Rama tha se, “do marrim njëherë kohën që të mbarojë të gjithë hetimet SPAK-u, të çojë gjithë akuzat nëse ka të tjera në gjykatë”.

“Dhe pastaj sigurisht që çështjen e grupit të strukturuar kriminal do ta trajtojmë në gjykatën përkatëse. Nuk flas për emra, por me siguri që, për fat të keq, s’e nuk është dëshira ime, tani e kemi bërë gjykatën si një vend ku takohemi me zonjën Tabaku. Do takohemi përsëri por pasi të mbarojë kjo.

Zonja Tabaku është recidiviste për shpifje,(përsëritëse-Redaksia SARANDANEWS.AL) më vjen keq por do më duhet ta bëj prapë sepse është shumë e rëndë nuk ndodh në asnjë vend, sado e tensionuar të jetë lufta politike, që një politikan, një parti politike, një politikane, të angazhohet me publikun për të ngritur akuzën e një grupi të strukturuar kriminal. Është diçka që nuk ndodh. Është përtej. Sigurisht, por jo përpara sesa të bëhet i gjithë hetimi. Kur të mbarojë i gjithë hetimi, jo i komisionit s’e ky s’është hetim, është një farsë, por hetimi SPAK-ut, atëherë sigurisht që do të shkojmë në gjykatë patjetër. Si qenka, kjo muaj të tërë rrokanis kokën e dynjasë u vodhën 430 milionë, i vodhën. Ku janë? S’janë”, u shpreh Rama./ATSH///