Asnjë rast me grip shpendësh në stabilimentet e prodhimit për mish

 Ministrja e Bujqësisë dhe Zhvillimit Rural, Frida Krifca zhvilloi te enjten një takim me shpendrritësit e stabilimenteve për mish në vend për të diskutuar mbi shëndetin në ferma.

“Deri më sot nuk kemi pasur asnjë rast të infektuar dhe situata për ta rezulton e pastër, pa asnjë gjendje klinike, vërtetuar dhe nga kampionimet e shtuara për analiza të kryera, si edhe rritja e vigjilencës ndaj masave të biosigurisë”, tha Krifca. Ndërkohë, sipas ministres, “AKU është në monitorim të tregjeve ushqimore ku shiten pula për konsum, duke siguruar se produktet e shpendëve dhe nënproduktet e tyre kanë gjurmueshmëri dhe janë të garantuara në plotësimin e standardeve”.

“Referuar Organizatës Botërore të Shëndetësisë dhe Organizatës Ndërkombëtare të Ushqimit dhe Bujqësisë, konsumi i mishit të pulës dhe vezëve nuk përbën rrezik për konsumatorin nëse ndjek në mënyrë rigoroze higjienën dhe gatimin e produkteve me temperaturë mbi 70 gradë celcius”, tha ajo.

Krifca tha se “aktualisht sektori i shpendarisë është ndër sektorët më të rëndësishëm për furnizimin me produkte shtazore, jo vetëm të kërkesave të vendit por edhe në eksporte”.

“Vetëm në 10 vitet e fundit niveli i prodhimit të mishit nga shpendët është trefishuar, ndërsa prodhimi i vezëve ka arritur të plotësojë kushtet e eksportit në vendet e BE për 6 prej stabilimenteve shqiptare”, tha ajo.///