18 vjeçari Anri Kashikut, shpallet “Dëshmor i Atdheut”

 Kryeministri Edi Rama ka vizituar sot familjen e Anri Kashikut, në Durrës, për t’i shprehur ngushëllimet.

Rama është takuar me familjarë të 18-vjeçarit, të cilët mes lotëve e hidhërimit të thellë kanë pritur kryeministrin.

Me lule në duar dhe i shoqëruar nga ministrja e Turizmit dhe Mjedisit, Mirela Kumbaro, kryeministri i ka shprehur ngushëllimet familjarëve për dhimbjen e madhe pasi 18-vjeçari, Anri Kashiku, dha jetën e tij duke shpëtuar dy jetë, vëllain e vogël dhe shokun e tij.

Kryeministri Rama i ka dorëzuar familjes certifikatën e shpalljes “Dëshmor i Atdheut” për Anri Kashikun.

“Sipas ligjit të ri që kemi bërë ne dhe që lidhet me aktet e heroizmit, se ai shpëtoi dy jetë, ai shpallet “Dëshmor i Atdheut””, tha Kryeministri Rama.

“Ngushëllime! Në familjen e Anri Kashikut, heroit që dha jetën e vet për të shpëtuar dy jetë, vëllain e vogël dhe shokun e tij”, shkruan Rama në postimin e tij në rrjetet sociale, teksa ka publikuar dhe pamje nga kjo vizitë.

Anri Kashiku humbi jetën dje në moshën 18-vjeçare në Sektorin Rinia, Durrës, i cili u fut në det për të shpëtuar dy fëmijë të mitur dhe vëllain e tij.

Në njoftimin e Policisë së Shtetit bëhet e ditur se, për të ndihmuar fëmijët, në det janë futur edhe roja bregdetare dhe shtetasi A. K., vëllai i njërit prej të miturve.

“Pas ndihmës së dhënë, fëmijët janë nxjerrë në breg, ndërkohë që 18-vjeçari A. K. nuk ka mundur të dalë dot pasi është mbytur për shkak të dallgëve të larta”, informoi Policia.

“Nga ana e punonjësve të Policisë të DVP Durrës dhe DVKM Durrës është ndërhyrë menjëherë dhe pas rreth 50 minutash është gjetur dhe nxjerrë nga uji, trupi i pajetë i shtetasit A. K.”, thuhet në njoftim./atsh///