“To Vima”: Mafia shqiptare ka rekrutuar edhe policë grekë

Sulme vrastare, zhvatje, trafik droge… Aktiviteti i organizatave kriminale që drejtohen nga burgjet po rritet. Tani flitet për rekrutime të reja. Madje ka raportime edhe për përfshirje të policëve grekë në këtë aktivitete të paligjshme.

5 banda shqiptare që dyshohet se operojnë në burgjet e Greqisë Qendrore dhe Jugore janë përgjegjëse, sipas zyrtarëve të lartë të policisë greke, për sulmet e përgjakshme që po ndodhin muajt e fundit në Athinë. Në disa prej këtyre bandave ka raportime për “shërbime speciale” nga vetë policia greke pasi pjesë e tyre janë edhe oficerë të betuar.Fokusi kryesor për më shumë prej 15 sulme kriminale të ndodhura në periudhën e fundit është tek kontrolli i trafikut të kokainës dhe heroinës për zonat e ndryshme të kryeqytetit grek. Në radhë të dytë janë të ardhurat nga shtëpitë publike, klubet e natës, por edhe mbrojtja e bareve, kafeneve, etj.

Si u rritën shqiptarët?

Vrasja e dyfishtë e 2 shqiptarëve, pak ditë më parë, në një lokal plot me njerëz në Nea Smyrni në Athinë konsiderohet një shembull i qartë i rritjes, zgjerimit dhe demonstrimit të fuqisë së mafias shqiptare në vendin tonë. Zgjerimi i tyre u bë nga rekrutimi i “përmbaruesve” të rinj, disa prej të cilëve konsiderohen “të kushtueshëm”.

Sulmet në vende publike hapën një cikël të ri konfliktesh që lidhen me “dërgesa të humbura droge”, spiunime në polici, zgjerimi i territorit, bashkëpunëtorë të paqëndrueshëm apo mospagesa të gjobave. Policia greke po e shqyrton seriozisht mundësinë që sulmi në Nea Smyrni të lidhet me vrasjen, në maj 2021, të një krimineli shqiptar 32-vjeçar në një kafene në Sepolia. Nuk përjashtohet mundësia që ndoshta të jetë i njëjti autor. Për më tepër, ka prova të qarta se shumë nga sulmet e tanishme vijnë nga kriminelë shqiptarë – shumica e të cilëve janë të burgosur – të cilët ishin të lidhur me një bandë të madhe shqiptare që veproi në 2004-2008 në qendër të Athinës dhe gjetkë. Ajo ishte përgjegjëse për 11 vrasje në atë kohë.

Oficerët e policisë greke kanë gjetur madje “video” të mafiozëve shqiptarë në Athinë duke demonstruar kallashnikovët e tyre, apo si përplaseshin me policët e DIAS. Në disa prej tyre ata shfaqen si truproja të këngëtarëve të rinj të huaj të muzikës. Madje në një nga këto “videoklipe” ata kërcënojnë policët duke u thënë se “e dinë se ku ata jetojnë”.

“Banja e gjakut”

Ky përshkallëzim i aktivitetit të mafias shqiptare në vendin tonë është mbajtur shënim edhe në raportet e Europolit. Sipas tyre, janë aktive 15 organizata kriminale të vendit fqinj dhe degë të tyre, të cilat kanë lidhje me trafikun e kokainës. Ky aktivitet lidhet me shumicën e vrasjeve në Greqi. Ata kanë lidhje me Ndranghetta dhe Camorra në Itali, por edhe me rrjete kriminale në Kolumbi, Marok, Santo Domingo, Spanjë dhe gjetkë. Përveç kësaj, në trafikun e heroinës ata kanë kontakte me mafian italiane të Pulias.

Grupi i parë që tërhoqi vëmendjen e Autoriteteve Greke të Sigurisë ishte një organizatë e madhe kriminale që fillimisht operoi, siç u përmend më lart, në periudhën 2005-2008 duke shkaktuar mjaft gjakderdhje. 45-vjeçari Klaudian L., (Klodian Leokocaj shënim i lapsi.al) ish-bashkëpunëtor i një krimineli të vrarë grek, i ndaluar në burgjet e Korydallos dhe Kretës është konsideruar si figura kryesore e saj.

Klaudian L. akuzohet nga policia se ka drejtuar (edhe pse ai i mohon të gjitha akuzat) nëpër burgje një grup prej 20 anëtarësh shqiptarë, të cilët kryen një sulm të përgjakshëm në Mikrolimanos në vitin 2014 kundër klientëve të pabindur për dhënien e gjobave. Ata vranë një 44-vjeçar në një lokal në Metaxourgeio dhe sulmuan një avokat në Penteli në të njëjtën periudhë.

Shantazhet

Vrasja e avokatit Michalis Zafeiropoulos në 2017, pastaj 3 sulme të tjera kriminale ndaj bashkëqytetarëve në burgje u pasuan me grabitje të përgjakshme në qendër të Athinës. Me veprimtarinë e së njëjtës bandë disa vite më parë është marrë edhe Shërbimi Antiterrorist. Ai regjistroi përfshirjen e saj në zhvatjen e ish-ministrit dhe avokatit të ndjerë Dimitris Tsovolas, në grabitje dhe trafik droge, etj.

Të njëjtët të burgosur kriminalë shqiptarë qëndrojnë pas sulmit të 31 korrik 2022 kur u vra një 39-vjeçare rome. Ajo u qëllua për vdekje në rrugën Stratigou Makrygianni në Agia Varvara. Krimi në fjalë i atribuohet trafikut të drogës. Për këtë u arrestua një shqiptar, Hetri Tsovola.

Oficerët e policisë ndaj nuk përjashtojnë mundësinë që pas sulmeve të njëpasnjëshme që mori në qendër të Athinës 32-vjeçari Aristides P. fshihet e njëjta bandë. Ai u ekzekutua në maj 2021, në një kafene në Sepolia. 32-vjeçari kishte qenë anëtar i bandës së lartpërmendur, por ishte ndarë. Ai ishte marrë me aktivitete të ndryshme kriminale dhe dyshohet se është përplasur me ish-bashkëpunëtorët e tij.

“Kontratat e vdekjes”

Policia greke ka kthyer edhe një herë vëmendjen tani nga vrasja e Aristides P. Bëhet fjalë për 2 shqiptarë që u shpallën në kërkim në atë kohë, por më pas nuk u kapën dot. Ka dyshime se është e njëjta dorë që qëndron edhe pas vrasjes së fundit të 2 shqiptarëve në Nea Smyrni.

Në policinë greke thonë se janë 2-3 emra të huaj nga shteti fqinj që konsiderohen se janë thirrur në vendin tonë për të finalizuar “kontratat e vdekjes” dhe më pas të kthehen në vendlindje. Në kërkim është edhe një kriminel shqiptar, i cili konsiderohet si një nga urdhëruesit kryesorë të vrasjeve jo vetëm për mafian shqiptare, por edhe për atë greke. Nën dritën e këtyre ngjarjeve pati edhe një rikthim të vëmendjes tek qelitë e Klodian L. si dhe kriminelëve të tjerë shqiptarë në burgjet e Kretës ku u kërkuan prova.

Të ardhura marramendëse

Në raportet e policisë greke për krimin e organizuar thuhet se janë rreth 2500 anëtarë të grupeve kriminale. Ata kanë përfituar rreth 300 milionë euro nga aktivitetet kriminale vetëm për rastet e hetuara nga policia. 10-15% e aktivitetit kriminal lidhet me veprimtarinë e bandave shqiptare. Importi i kokainës në Greqi shkon deri në 10-15 tonë në vit. Ajo kap vlerën e më shumë se 500 milionë euro. 26% e trafikut të kokainës u përket bandave shqiptare. Ato kanë 31% të trafikut të hashashit.

Karuseli i krimit

Policia greke po shqyrton nëse pas “luftës” mes mafies shqiptare mund të fshihet një grup kryesor banditësh që ka marrë emrin e një lokali nate në Athinë. Sipas disa të dhënave nga hetimet e policisë, drejtues mund të jetë një kriminel i njohur shqiptar, i burgosur në Greqinë Qendrore. Ai është akuzuar për “kontrata vdekjeje” dhe arratisje. Ai vetë e mohon se është përfshirë në veprimtari të paligjshme.

Në të njëjtin grup, sipas të njëjtave vlerësime të organeve të sigurisë është edhe një tjetër shqiptar i akuzuar për vrasje të mbetur në tentativë, grabitje të armatosur, trafik droge, posedim të armëve dhe municioneve luftarake dhe arratisje nga burgjet. Shqiptari në fjalë, i cili u arrestua edhe për një ngarkesë të madhe kokaine në Greqinë Qendrore, duket se ka pasur kontakte – sipas një raporti të brendshëm të organeve të sigurisë – me zyrtarë të policisë greke dhe disa individë nga Kreta.

Sipas të njëjtave dokumente të brendshme, grupi e ndërpreu veprimtarinë e tij kur disa nga anëtarët u arrestuan për krime të tjera. Nën hetim është edhe një tjetër shqiptar, 37-vjeçari me iniciale F.D.. Ai është i dënuar me burgim të përjetshëm për grabitje me pasojë vdekjen në Athinë, për vrasjen në Selanik të një bashkatdhetari 25-vjeçar. Thuhet se ai ishte kontakt me të njëjtët kriminelë dhe për plagosjen e një personi të përfshirë në një rast të trafikimit të qenieve njerëzore në kryeqytet. F.D. u zbulua se kishte një kanal komunikimi edhe me planin e madh të arratisjes nga burgjet e Korydallos, në vitin 2015.

Së fundi, në të njëjtin hetim, policia po verifikon marrëdhëniet e F.D. me një 46-vjeçar shqiptar me pseudonimin “Takis”. Ai u akuzua për vrasjen e një bashkatdhetarit të tij në një lokal në Glyfada. Më pas u shpall i pafajshëm për shkak të për informacioni të pasaktë.

Megjithatë, ai po përballet me një akuzë të re për organizimin e vrasjes, në vitin 2014, të bashkatdhetarëve të tij që udhëtonin me një makinë SMART e cila u hodh ne erë me eksploziv në Attiki Odos. “Takis”, i cili gjithashtu mohon çdo përfshirje për shpërthimin mësohet se është arratisur në një vend europian.

Policia ka përqendruar vëmendjen edhe te një tjetër kriminel shqiptar me inicialet K. D., i cili gjithashtu ishte i përfshirë në bandën e lartpërmendur. K. D., i cili ishte akuzuar si për vrasjen e një ish-bashkëpunëtori të tij si dhe për një çështje droge, dyshohet se ka pasur një rivalitet të mëhershëm me Aristides P. të vrarë në Sepolia dhe gjithashtu me ish-bashkëpunëtorët e tij.

Madje, autoritetet e sigurisë kishin regjistruar më parë aktivitetin e një shqiptari që kishte tentuar të arratisej në mars të vitit 2013 nga burgjet e Trikalas. Arratisja nga ky burg çoi më pas në përgjakjen me grupeve të mafias shqiptare në Greqinë Qendrore dhe Veriore. ©Marrë nga To Vima. ///