Arrestohet autori i vrasjes së trefishtë, Çuçi: Ngjarja mund të shmangej nëse ai do të ishte në burg

Ministri i Brendshëm, Bledi Çuçi përgëzoi mbrëmjen nje dite me pare Policinë e Shtetit për arrestimin, siç tha ai, të një krimineli të regjur, që sot mori jetë të pafajshme në Kamzë.

“Një ngjarje e rëndë, që mund të ishte shmangur nëse autori do të ishte në burg nga sistemi i drejtësisë në të shkuarën për skedën e tij kriminale”, u shpreh Çuçi.

“Edhe një herë Policia e Shtetit dëshmoi profesionalizëm dhe bëri detyrën duke çuar prapa hekurave autorin, që nuk duhet më kurrsesi t’i shpëtojë ndëshkimit më të ashpër të drejtësisë. Ngushëllime familjeve të viktimave!”, përfundoi ministri i Brendshëm.

Dan Hutra është arrestuar pas disa orësh kërkime në Landfillin e Sharrës nga Policia e Shtetit, pasi terrorizoi kryeqytetin duke vrarë 3 gra dhe plagosur 3 të tjera.

Ngjarjet u regjistruan në 3 zona të ndryshme të qytetit, përkatësisht në Paskuqan ku vrau 2 gra dhe plagosi dy të tjera, ndërsa dyshohet po ashtu se ka vrarë një tjetër grua në Kamzë dhe plagosur një tjetër në Astir.///