/ATSH/ Programi i asistencës teknike gjermane GIZ në kuadër të projektit për kufizimin e mbetjeve plastike që përfundojnë në det, i cili po zbatohet në bashkinë e Finiqit, dhuroi së fundi për këtë njësi administrative në jugperëndim të vendit, edhe një makinë teknologjike pastrimi me vlerë 56 mijë euro.
Zyrtarët e bashkisë i thanë ATSH-së, se ky automjet me parametra bashkëkohorë dhe i manovrueshëm do të përdoret nga shërbimi i pastrimit për transportin e mbeturinave nga çdo fshat në landfillin e Bajkajt, 6 km nga Finiqi.
Kryetari i bashkisë, Kristo Kiço falënderoi GIZ dhe veçanërisht drejtuesin gjerman të projektit, Hermann Pllum për disponibilitetin, përkushtimin dhe korrektësinë në lëvrimin e ndihmave dhe mjeteve infrastrukturore për përmirësimin e menaxhimit të mbetjeve urbane në bashki.
Pak ditë më parë GIZ i dhuroi Finiqit edhe një numër kontejnerësh për grumbullimin e diversifikuar të mbeturinave urbane.
Bashkia e Finiqit, një ndër dhjetë bashkitë më të mëdha në vend sa i përket territorit, përbëhet nga 58 fshatra.
Ajo është palë në dokumentin e njohur si Marrëveshja e Ulqinit (janar2020) krahas bashkisë homologe të Lezhës dhe disa bashkive nga Mali i Zi, Bosnjë-Hercegovina, etj., përfituese në Projektin Menaxhimi i Integruar i Mbetjeve dhe Parandalimi i Mbetjeve Detare në Shqipëri, (2020-2021). Projekti financohet nga Ministria Federale për Zhvillimin dhe Bashkëpunimin Ekonomik e Gjermanisë (BMZ) dhe zbatohet nga GIZ.//’/
ME SHUME LAJME
Sport. Ekipi i “Adem SHEMES”, Kampion i Qarkut të Vlorës në basketboll
Sarandë. Rigels Dervishi zgjidhet kryetar i Dhomës Vendore të Avokatisë
Sarandë. Policia shpalli në kërkim 5 shtetas që në një konflikt qëlluan me armë zjarri.