Gjirokastër, dëgjesë publike për planin e menaxhimit të Parkut Kombëtar Lumi Vjosa

 Agjencia Kombëtare e Zonave të Mbrojtura zhvilloi sot në Gjirokastër takimin e konsultimit publik mbi prezantimin e “Planit të Integruar të Menaxhimit për Parkun Kombëtar Lumi Vjosa” me të gjithë institucionet dhe aktorët faktorë të qarkut.

Nën drejtimin e drejtoreshës së Përgjithshme të AKZM-së, Daniel Pirushi, në takim ishin të pranishëm prefekti i qarkut Gjirokastër, Odise Kote, përfaqësues të bashkive të qarkut Gjirokastër, si dhe pjesëmarrës nga shoqëria civile dhe organizatat mjedisore.

Drejtoresha e AKZM-së Pirushi prezantoi rëndësinë e këtij kapitulli, i cili konsiston në miratimin përfundimtar të dokumentit të “Planit të Integruar të Menaxhimit për Parkun Kombëtar Lumi Vjosa” i përbërë nga 6 kapituj kryesorë: plani i menaxhimit, zonimi i zonës së mbrojtur, studimi ekologjik, analiza socio-ekonomike, plani financiar si dhe masterplani i turizmit.

Pirushi prezantoi edhe pasaportën e re të Lumit Vjosa tanimë në kategorinë Rezervë Biosferë, pjesë e programit “Njeriu dhe Biosfera” të UNESCO-s.

Përmes qasjes së forcimit të ndërveprimit të qëndrueshëm midis komuniteteve dhe mjedisit, procesi synon t’i japë një orientim zhvillimit të Luginës së Vjosës.

Pjesë e rëndësishme e takimit ishin konsultimet publike me pjesëmarrësit ku pati zhvillime për sa i përket problematikave që lidhen me shfrytëzimin e burimeve ujore të Vjosës nga komuniteti, problematika lidhur me menaxhimin e mbetjeve urbane apo trajtimin e ujërave të zeza nga bashkitë e qarkut si dhe qasja e bizneseve private kundrejt kërkesave dhe kufizimeve të parashikuara në dokumentet e menaxhimit të Parkut Kombëtar Lumi Vjosa.(Klodi SARAÇINI) ///