Aeroporti i Vlorës po ndërtohet në gjurmën ekzistuese të ish-aeroportit ushtarak

Ministrja e Turizmit dhe Mjedisit, Mirela Kumbaro deklaroi sot në Kuvend se “projekti i aeroportit të Vlorës është propozuar të kryhet as më shumë e as më pak, por në gjurmën ekzistuese të ish-aeroportit ushtarak, të ndërtuar në fillim të viteve ‘20 dhe ka qenë funksional deri në vitin 1970″.

Në fjalën e saj në interpelancën e kërkuar nga deputetët e Partisë Demokratike, ministrja Kumbaro theksoi se “projekti i aeroportit ndodhet në zonën C, që nuk është as zona qendrore, as në zonën e qëndrueshme B, nuk prek monumentet e natyrës të identifikuara si: Dumat e Nartës, Laguan Laguna Limopuo, as Kodrat Molastike të Zvërnecit, Pylli i Zvërnecit dhe nuk preket fare Laguna e Nartës ku ndodhen edhe vendet e parapëlqyera të shpendëve dimërues”.

Ministrja Kumbaro tha se “bazuar nga këto studime dyvjeçare nga Agjencia Kombëtare e Zonave të Mbrojtura dhe Ministria e Turizmit dhe Mjedisit, për përditësimin dhe saktësinë e kufirit dhe zonimit të brendshëm të zonave të mbrojtura, zona e propozuar për zhvillimin e aeroportit është hequr nga territori i zonës së mbrojtur me vendim të Këshillit Kombëtar të Territorit”.

Duke treguar hartën e zonës së mbrojtur, Kumbaro u shpreh se “Agjencia Kombëtare e Mjedisit mbetet e angazhuar për të mbrojtur speciet e pranishme brenda peizazhit të mbrojtur”.

Ministrja Kumbaro theksoi se “mjedisi mbrohet pa asnjë dyshim, por sigurohet edhe zhvillimi i qëndrueshëm i gjithë zonës për qytetarët që aq shumë e kërkojnë këtë projekt në funksion të turizmit dhe të ekonomisë. Ky aeroport do të jetë një pol i ri turizmi që favorizon Shqipërinë”.

Kumbaro bëri të ditur se “po punojmë për të shpallur gjithë Luginën e Vjosës Park Kombëtar”.///