BE mbështet adresimin e çështjes së personave të zhdukur gjatë komunizmit

Në kuadër të kurimit të së shkuarës, BE mbështet adresimin e çështjes së personave të zhdukur gjatë regjimit komunist.Autoriteti për Informim mbi Dokumentet e ish-Sigurimit të Shtetit publikoi deklaratën e Frederique Hanotier të delegacionit të BE-së në Tiranë.

“Përballja me të shkuarën është thelbësore në ndërtimin e një shoqërie demokratike dhe të mirëqenies, të bazuar në parimet e të drejtave të njeriut. Në këtë aspekt, autoritetet janë përgjegjëse për të ndërmarrë masat e nevojshme për të siguruar mbrojtjen e të drejtave të viktimave dhe të familjarëve të tyre, duke përfshirë këtu të drejtën për t’u përkujtuar. Trashëgimia e diktaturës nuk duhet të jetë pengesë për të ardhmen, por duhet të shërbejë si kujtesë e fortë e punës së pambaruar të pajtimit dhe shërimit. E shkuara e pazgjidhur nuk mund të varroset, por me të duhet të veprohet haptazi, duke respektuar transparencën dhe përgjegjësinë. BE është e përkushtuar ndaj mbështetjes së palëve të interesuara për ta fuqizuar bashkëpunimin në këtë fushë, në kontekstin e hyrjes e Shqipërisë në BE, si çështje e të drejtave të njeriut dhe çështje e sundimit të ligjit në veçanti. Mbështetja e BE për adresimin e çështjes së personave të zhdukur gjatë regjimit komunist kontribuon në reformën në drejtësi dhe lidhet me këtë kontekst”,  thuhet në deklaratën e Frederique Hanotier të delegacionit të BE-së në Tiranë.//atsh///