Berisha me demokratët në Durrës: PD kishte nevojë për ringritje, një mision i madh na pret

Kandidati për kryetar të Partisë Demokratike ish-kryeministri, Sali Berisha ka zhvilluarte marten një takim me demokratët në qytetin e Durrësit.

Berisha tha se, pas disfatës së zgjedhjeve të 2021, PD kishte nevojë për ringritje.

“Ju falënderoj për mbështetjen e çmuar që i keni dhënë PD-së që nga themelimi e deri sot. Në mënyrë të veçantë për rolin tuaj në themelimin e kësaj force politike. Pas një udhëtimi të vështirë, pas një udhëtimi plot pengesa, por pas një udhëtimi unik në historinë e Evropës. Në një moment të caktuar ndërmorëm udhëtimin tonë për t’u rikthyer te vlerat tona, parimet tona. Për të ngritur në këmbë forcën tonë politike, e cila kalonte nga disfata në disfatë. Në fillim të kësaj lëvizje, askush nuk parashikonte se sot ne do të ishim një forcë aktive me 40 mijë e më shumë anëtarë. Një ushtri e vërtetë idealistësh, misionarësh”, theksoi Berisha.

Berisha u shpreh se “nëse rikthehemi disa muaj më parë, kisha deklaruar se kjo lëvizje është e pandalshme. U shpreha që revolucioni nuk ndalet më dhe koha e provoi. Sot ja ku jemi, opozitë e vërtetë e Shqipërisë”.

“Nëse nuk do të ngriheshim do të ishim një lolo. Vegël e një qeverie. Shembullin po e shihni në marrëdhëniet Rama-Alibasha”, tha Berisha.

Berisha theksoi se “ne arritëm, por në këtë stacion ku jemi, një mision i madh na pret, i një rëndësie jetike. Për interesat e këtyre qytetarëve, për qenien tonë dhe identitetin tonë kombëtar, për të ardhmen tonë, të këtyre të rinjve dhe fëmijëve tanë”.///