Bllako: Paraqes dorëzimin e mandatit të deputetit

 Deputeti i Partisë Socialiste, Alqi Bllako informoi se sot do t’i paraqesë kryetares së Kuvendit dorëzimin e mandatit si deputet i Republikës së Shqipërisë dhe do të përballet me akuzën pa asnjë privilegj. Në një reagim ndaj kërkesës së SPAK drejtuar Kuvendit për heqjen e imunitetit,  Bllako theksoi se ndihet i tronditur nga kërkesa e SPAK-ut për ndalimin e tij.

“Kam bindjen e thellë që një proces i paparagjykuar dhe i drejtë do ta provonte lehtësisht pafajësinë time; me bindjen e palëkundur se as kam shkelur kurrë ligjet e vendit e madje as kam thyer kurrë etikën e detyrës që kam ushtruar! Sidoqoftë, nuk ka arsye të angazhohet Kuvendi i Republikës së Shqipërisë për këtë çështje dhe as nuk dua të përfitoj apo të më ofrohet një trajtim ndryshe nga çdo qytetar tjetër i vendit tonë”, u shpreh ai. “Unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik. Si një qytetar i zakonshëm, si prind dhe familjar i përgjegjshëm dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë”, tha Bllako.

Bllako u shpreh se “ju jam thellësisht mirënjohës për mbështetjen.Mezi pres t’u provoj të vërtetën dhe të drejtën e pastër miqve dhe padyshim armiqve”.SPAK njoftoi sot se ka kërkuar heqjen e imunitetit të deputetit socialist Alqi Bllako.///